WSG-2015 nung India nungi mata-mabensartemi Gold 3 angu

New Delhi, July 31 (Agencies): US nung tasayadak aliba World Summer Games (WSG) 2015 nung Delhi sorkar kübok aliba Asha Kiran Home nung alir mata mabensartemi gold medal 3 aser bronze medal 4 nguogo, ta Hokolbar nü ketdangsertemi metetdaktsü.
Phoolan Devi-i power-lifting (Bench Press) nung India atema mezüngbuba gold medal angu. Laisa power-lifting (all lifts, dead-lift & squat lift) nung bronze medal asem angu.
Sonakshi-i power-lifting (bench-press) nung bronze angu aser Mathru-i Soft-ball (team event) nung gold medal agizük. Tang tashi nung Asha Kiran nung alirtemi medal 7 agizüka lir, ta ketdangsertemi sangdong ka ajanga metetdaktsü.
WSG asayamung ya Los Angeles, US nung July 25 nü tenzük aser August 2 nü atemtsü.
Special Olympics-Bharat-i, Asha Kiran nung alir parnok 10 shimtetba ya district, state aser national sasep nung tetoktepba balala nung takok angurtem shimba lir, ta kasa sangdong ajanga ashi.
Special Olympics Bharat ya mata mabensa pur asaya balala asayadaktsüba ajanga parnok taküm nung temelenshi adokdaktsütsü asoshi tentetba lir.