WSH-i ILP atema anogo latettsü pusemer: CNTC

Dimapur, October 22 (TYO): Western Sumi Hoho-i anogo 30 tsüngda akhi ama ILP gate lapoktsü takhangba agütsüba nung Central Nagaland Tribes Council(CNTC)-ia pusema nungiter, ta tanü metetdaktsü.
WSH-i ano latettsübaji October 24, 2017 nü tembanger.
October 19, 2017 nü Dimapur nung Ao Senden, Lotha Hoho aser Sumi Hoho nungi teshimtet nübotem den senden amendang iba telemtetba agi.
Maneni, Tribal Union Chumukedima Town (TUCT)-i October 5, 2017 nü Chumukedima rally nung lemtetba bangzüng 10 CNTC-ia pusema nungittsü lemtetogo, ta Media Cell sangdong ka nung metetdaktsü.
Nisung ajaki yaritepa ozüng alema arurtem anema mapa inyaktsüla aser iba nung civil society temi akhangba ama sorkari mapa inyaktsüla. Asen tarutsü putu ajungtsü atema nübortemi asen sorkar nem mapa inyakdaktsünür. Anungji, state sorkari public aser civil society nem dang khuret mebenloktsüi, iba onük atema amalitepa mapa inyaktsüla, ta CNTC-isa ashi.
Ozüng alema arurtem nem indigenous trade aser commercial vehicle license agütsüba atema CNTC-isa state sorkar dang iba ozüng alema inyakba mapa anentsü tetuyuba agütsütsü aser agüja alibatem tangsa tang meyipa agitsü takhangba agütsür, ta Media Cell sangdong nungsa shia lir.
Nisung aika ozüng alema arua aliba ajanga asen lokti aser litsü asoshi lendong tulu bener arutsütsü ana nungdang lir. Anungji, Naga nunger ajak saksalemtsüla aser ola madoki malitsüla. Nübortemi shimtetba sorkar aser tanishir ajaki metsübui mesüra tejak mereprangi iba onük anema mapa inyaktsü nüngdaker, ta CNTC-isa ashi.