WSH-i R&B minister & I&FC Parliamentary Secy. mapa nungi anentsü akhanger

Dimapur, July 12 (TYO): Western Sumi Hoho (WSH) aser parnok kübok aliba teloktem July 12, 2017 nü rongdak senden ka ayonga amendang R&B minister Vikheho Swu-i 4th mile nung apu chirepba lendong atema tebilemtsü bena mapa nungi anentsüla ta telemtetba ka agia takhangba agütsüogo.
Iba apu ya yimtsüng 120 dak tema atema lenmang tongtiba liasü saka minister-i zübazülema toktsüba ajanga chirepogo. Anungji, minister dak mulungsentsü lira, iba lendong atema pai tenüng agia minister menden nungi alutsüla, ta WSH mendenpurtemi sangdong ka nung metetdaktsü.
Parnokisa, “2015 nung iba apu yanglutsü atema sen crore 37 lemzüktsüba kongi ao” ta R&B minister dang nungi telangzüba meshiogo.
Iba tatalokba atema police-i bushisüngdang ka tenzüktsüla aser aibelenertem pua ozüng tapet agi merenshitsüla, ta WSH-isa takhangba agütsü.
Iba apu yanglutsü atema engineer aser contractor temi public senzütsü atema Siethekhema-Patkai lenmang meyanglutsüra, WSH-i kechi junger ta bilemdir inyaktsü, ta sangdong nungsa shia lir.
Mongulbar nikongdang apu chirepdang nisung 4 asüba kibongtem den asükhu lemsateper aser iba lendong nung taküm samar kibongtem aser yirua alirtem nem teyari agütsütsü takhangba agütsür, ta WSH-isa ashi.
Ano külen, WSH-isa Irrigation & Flood Control Parliamentary Secretary, Jacob Zhimomi tangsatang mapa nungi anenang ta takhangba agütsü.
Yevetol, Hakhizhe, Kiyezu, Hetoi aser Zuheshe yimtsüngtem Zubza ayong nungi tzümetsüng agi mobanga lir aser tzümetsüng ajanga alu, süngdonglidong tsünüba aser kiojen aika raksatsüogo.
Tzümetsüng timtem ajurua aliba yimtsüngtemji Jacob Zhimomi indang constituency kübok lir. Taoba mapang pai flood control mapatem inyaktsütsü ta nangzüka liasü saka pai jembiba aser mapa meputep lir, ta WSH-isa ashi.
Iba tesem nung flood control maparen shitak meinyakba ajanga, kümshia yimdaklirtemi timtem jenti ajurur. Anungji, tzümetsüng ajanga takoksa ajurua alir nem teyari shitak agütsütsüla, ta WSH-isa takhangba agütsü.
MLA temi pei teinyaktsü mapa timi inyaktsüla kechiyong nenokji nübortemi mapa inyaktsü atema shimba lir. MLA kati pa nem lemzüktsüba portfolio indang mapa meinyaktetra toktsütsüla, kechiyong tebilemtsü kecha mebeni portfolio kija amba agi kin atema maaksü aser nübortem nem timtem ang bener arutsür, ta WSH-isa metetdaktsü.