WSH-i Sumi Hoho aser CNTC pusemer

Dimapur, February 8 (TYO) : February 8, 2017 nü Western Sumi Hoho (WSH)-i parnok kübok tongtipang teloktem den HQ. Chekiye Village nung senden ka ayonga amen.
Iba senden nung WSH den Western Sumi Kukami Hoho (WSKH), Western Sumi Totimi Hoho (WSTH), Western Sumi Youth Front (WSYF), Western Sumi Students’ Union (WSSU) aser Western Sumi Sports Association (WSSA) nungertem aden.
Senden metenzükdang WSH Advisor, Ghosuho Zhimo-i temoatsü meshia sarasadem aser iba mapang tesentepertem January 31, 2017 nü taküm bendanga agütsür lanur ana nem minute ka ola madoki tetushi agütsü.
Senden nung adenertemi Sumi Hoho aser CNTC nati tetsür nem shilem 33 lemzükja ULB elections magidaktsütsü ta telemtetba agia aliba pusema nungittsü bangzünga renem.
Iba onük atema WSH-i tekaratiba nung ULB elections dak sendakba maparen ajak agiener ta asüba ‘official notification’ ka state sorkari sangdongang ta mepishia metetdaktsü.
CNTC-i pei kübok federating units den ‘consultative meeting’ ayonga amentsüla kechiyong CNTC kübok JCC tentetba sülen iba mesükba senden ayonga mamen, ta WSH-isa mepishia metetdaktsüogo.
ULB elections dak sendakba nung Dimapur Naga Youth Front (DNYF) tentet aser ibaji JCC den kasa lir, anungji CNTC aser JCC nati DNYF indang maparen mita reprangtsü atema mepishi. Pei kübok aliba unit tem sasep nung terata melidaktsütsü atema DNYF ajanga masü saka CNTC/JCC ajanga dang sangdongtem agütsütsüla, ta WSH-isa metetdaktsü.