WSSU 37 buba Lokti Mungdang tembangogo

Dimapur, January 31 (TYO) : January 29, 2016 nü Niuland nung Western Sumi Students’ Union (WSSU) 37 buba Lokti Senden tenzüka agiyonga arur Deobar nikongtsütsü tembangogo.
Mungdang shibangba sentong nung tongti tesemdangerji Department of Finance Secretary, Y. Kikheto Sema, IAS liasü.
Kikheto-i WSSU indang omen “With United Power” nung ajemdaker jembidang ashiba agi, telongjem melira tashi malitsü.
“Naga nunger külem tashi mali kechiyong asen aika nung melongjemi lir. Sumi nunger sasep nunga, asenok kidong tsüngda tetoktepba aser tsükong aser tesemtem tsüngda tetoktepba lir. Iba ama tensa ka nung kodaser chichiba tashi alitsü?” ta pai asüngdang.
Naga loktiliba aser talisa lanurtem longjemtsüla aser loktiliba jenjang ajungkettsüla. Lanurtemi pei sasa taküm liyonga otettsü atema meranga inyaktsüla aser lanur ka taküm lia aotsü asoshi entrepreneurship kanga tongtipang lir, ta Kikheto-isa tayongzükba agütsü.
Iba sentong nung Sumi nunger sorkar ketdangsertem, Sumi Kiphimi Kuqhakulu aser WSSU nung taoba mendenpurtem aika aden.
Tanep agiba session nung YouthNet Director, Hekani Jakhalu-i “Progressive Generation” omen nung ajemdaker o jembia liasü.