WTA Finals Caroline Wozniacki-i akok

October 29 nü Denmark tsür Caroline Wozniacki akokba sülen trophy den tangokba noksa nung angur.

Singapore, October 29 (Agencies): Singapore nung WTA Finals asayadang Denmark tsür Caroline Wozniacki-i Venus Williams tsükdakja la career nung takok tulutiba nguogo.
Arishi küm 37 tain Williams ya iba final tongteter tantsütila liasü aser la ya 6-4, 6-4 agi tsük.
Mezüng set nung tenaprongi kanga junga asayaba sülen tanabuba set nung World No. 6, Wozniacki-i 5-0 agi temaba liasü.
Iba sülen Williams-i straight game pezü agitet, saka arishi küm 27 tain Wozniacki-i tanabuba Championship point nguteta America tsüla madak mezüngbuba takok angu.
“Ni jangratema bilemer, yangi ni takoker ka ama aliba ya ni mamangteter,” ta Denmark tsürlai ashi.
“Venus Williams ya takoker ka lir aser lai ni atema asaya kanga tasak kümdaktsü. Ibai kü asoshi takok marok tulutiba lir,” ta lai shisem.
Simona Halep ya World No. 1 nung 2017 küm tembangtsü aser iba konang abener rongnung la ya 13buba akümer.
Romania tsürla temaba jenjang ya October tetenzüklen China Open nung tongtet aser la anasa alila Karolina Pliskova Honibarnü semifinals nung Wozniacki-i tsükdaktsüba sülen Halep ya iba jenjang nung küm tembangtsü jenjang ngutet.
World No. 5 Williams aser Wozniacki na tsüngda 2007 nungi asaya aruba nung America tsürlai 7 ben koka liasü aser Denmark tsürlai set ka dang kokdanga liasü.
Williams ya form nung liasü aser la ya taküm Australian Open aser Wimbledon finalist lir.
Saka WTA Finals nung Wozniacki-i akokba ajanga tennis asayar tejen, Williams, shibai küm 9 tejakdang iba takok marok bena liasü, lai takok marok kata monguteti küm tembangtsü.
Singapore nung taoba World No. 1, Wozniacki-i aces 21 nguteta asayamung tembangogo.