WTA Finals: Kuznetsova-i takok angu

Singapore, October 26 (Agencies): Russia tsür, Svetlana Kuznetsova-i Czech Republic tsür, Karolina Pliskova madak takok ngua, tang tasayadak WTA Finals tennis asayamong nung tanü, Bodbar nü shilem agiogo
Kuznetsova-i tanü ghonda 2 ser minute 17 tashi asayaba sülen points 3-6 6-2 7-6(6) ngua, Pliskova tsükdaktsü.
Poland tsür, Agnieszka Radwanska aser Spain tsür, Garbine Muguruza na tsüngda asaya nung Radwanska-i takok ngura, Kuznetsova-i küm 6 tashi nung tan mezüngsüa, tan asayamong semifinal asayatsü temeten angutsü.
Ano külen, WTA Finals takokba maneni angutsü nükjidong nung India tsür, Sania Mirza aser Switzerland tsür, Martina Hingis nati aroki lungjemer tetsür doubles asaya nung shilem agitsü renema lir.
Mirza o Hingis nati aroki lungjemer asaya 41 tashi atonga akokba den tetsür doubles tarensen nung World No. 1 akümba sülen tenati aroki lungjemer masayatsü telemtetba taküm August ita agia liasü.
Ajisüaka, tenati yaküm akokba WTA Finals tetsür doubles takok marok atema maneni asayatsüsa akümba yong tenati tan aroki lungjemtsüsa akümba osang angazükogo.
Mirza o Hingis nati par mezüngbuba asaya Chinese Taipei tsür, Hao-Ching Chan aser Yung-Jan Chan na den asayatsü lemzüka lir.