WTA Finals: Mirza o Hingis na final-i iogo

India tsür Sania Mirza (Abelen) aser Switzerland tsür Martina Hingis nati Chinese Taipei tsür Chan Hao-Ching  o  Chan Yung-Jan na WTA Finals semifinal asaya nung tsükdaktsüba sülen telok dak teka apiyokloktsüba noksa nung angur. (Singapore, October 31)

Singapore, October 31 (Agencies): Tetsür doubles World No. 1, India tsür Sania Mirza aser Switzerland tsür Martina Hingis nati takok ngua shilem agiba sülen tang tasayadak WTA Finals asayamong tetsür doubles shilem indang final asayatsü jenjang tanü Honibar nü nguogo.
Mirza o Hingis nati tanü points 6-4, 6-2 ngua Chinese Taipei tsür Chan Hao-Ching aser Chan Yung-Jan na tsükdaktsüba sülen tan agi taküm küm tenzüker tanü tashi nung final asaya 10 buba nung shilem agitsü jenjang angu.
Tan asaya akokba ya densema Mirza o Hingis nati asaya 21 buba atonga akoker lir.
Ano, tan final nung shilem agitsü jenjang anguba ajanga Mirza o Hingis nati küm tatemlen adoktsüba WTA tetsür doubles World No. 1 jenjang maneni abentsü jenjang tajung angur lir.
Tetsür singles shilem nunga, Poland tsür, Agnieszka Radwanska-i tanü ghonda 2 ser minute 41 nung points 6-7(5), 6-3, 7-5 ngua Spain tsür Garbine Muguruza tsükdaktsüba sülen tan mezüngsüa WTA Finals asayamong final asayatsü jenjang tanü nguogo.
World No.6, Radwanska-i Russia tsür Maria Sharapova semifinal asaya nung tsükdaktsüla, Czech Republic tsür Petra Kvitova den tan Deobar nü final asayatsü.