WTA Finals: Mirza o Hingis nati tanabuba asaya kokogo

Singapore, October 28 (Agencies): India tsür Sania Mirza aser Switzerland tsür Martina Hingis nati tang tasayadak WTA Finals tanabuba asaya tanü Bodbar nü kokogo.
Red Group indang round robin mezüngbuba asaya tan Hombar nü akoker, Mirza o Hingis nati tanü ghonda 1 ser minute 17 nung points 6-3, 6-4 ngua Czech Republic tsür Andrea Hlavackova aser Lucie Hradecka na madak takok angu.
Tetsür doubles shilem nung World No. 1 jenjang abener, Mirza o Hingis nati Hungary tsür Timea Babos aser Kristina Mladenovic na den tatembangbuba round robin asaya tan Hokolbar nü asayatsü lemzükogo.
WTA Finals asayamong ya temaba jenjang nung alir tetsür singles mesüra doubles asayar 8 round robin telok 2, Red aser White küma lemsar kümshi küm tatemlen asayaba tongti tennis asayamong lir.
Telok shia nung temaba jenjang 2 angurtemi semifinal nung shilem agitsü aser semifinal nung takok angur telok anati final asayatsü.
Grand Slam asayamong 4 sülenbo iba asayamong ya WTA Tour asayamong rong nung tongtiba lir.