Wuhan mozüki nung tekolakba coronavirus agi süogo

Beijing, Tsüklai/Feb. 18 (Agencies): Wuhan nung mozüki ka indang director ya coronavirus agi Mongulbarnep asü, aser China nung iba tashidak agi asür maneni lir.
China nung Mongulbarnü tashinung iba tashidak (COVID-19) yagi nisung 1,871 süogo aser nisung 72,500 dak tali iba tashidak agi kangshir.
Nisung 11,741 shi iba wara agi kanga mejungi shiranger, koba Hubei province yimtiba, Wuhan nung December ita putet.
Iba province nung nisung 59,989 dak iba tashidak mena aser item rongnung nisung 1,789 süogo aser nisung 7,862 taneptsü nguogo, ta health ketdangsertemi Mongulbarnü ashi.
Wuhan Wuchang Hospital indang director aser neurosurgeon, Lui Zhiming ya Mongulbarnep asü, ta state media ajanga ashi.
Pa komaser iba tashidak mena, iba indang osang ano mejangjateti lir.
Iba mozüki ya Wuchang district nung Yangyuan Street nung lir, aser Wuhan nung coronavirus agi shiranger anepalutsü mozüki tenet shimtetba rongnung iba mozüki ya ka lir, ta China Daily osangkaket nung shia lir.
Ita tetenzüklen Wuhan nung arishi küm 34 tain doctor Li Wenliang asü, shibai iba coronavirus meputetdang mejangjaba tashidak agi shirangba osang temai adoktsüba asoshi Wuhan police temi merenshia liasü.
Li asüba ajanga China nung nüburtemi social media sabang balala nung mangyimba aser tejashi lemsatepba ajanga sorkari January ita pa nem tenokdangba agütsüba maparen bushisüngdangtsü tenzük.
China nung mongintemi iba tashidak wara indang asadangtsü maparen tenzükba mapang ka nung Liu ya asü, aser mozüki 422 nung February 11 tashinung COVID-19 agi shiranger anepalur 3017 dak iba tashidak menaa lir, ta ashir.
Iba virus menokdangteti prokshia aoba mapang China-i linük tesem balala nungi doctor aser nurse tem anitena Wuhan aser Hubei nung shirangertem anepaludaktsür.
Hubei aser talisa Wuhan nung inyakba China nunger medic tem iba tashidak nungi kümzüka alitsü sübusolemtsü peria mali mapa inyaker.
“Novel coronavirus tashidak den raratsü asoshi taküm bendanga agütsüba medical worker nem China ketdangsertemi sempet tabu balala agütsütsü maparen tenzükogo,” ta state news agency, Xinhua ajanga ashi.
Iba tashidak agi shirangba aser asüba medics tem nem insurance agütsütsü, ta National Health Commission nung deputy director Zeng Yixin-i taoba hopta shia liasü.
Maneni tan hopta sangdong ka nung, iba tashidak den raraba mapang asür medics tem ya “martyrs’ ta sangdongtsü, ta shia lir.
Iba den külemi Hubei nung inyakba medics chirtem senior high-school entrance examination nung marks 10 talila agütsütsü, ta sangdonga lir.