Wuzu lendong nung asürtem bilemteta tetushi agütsü; AFSPA aser DDA agientsü atema takhangba agütsür

Kohima, July 16 (TYO) : Phek district kübok Wuzu yimtsüng nung yaküm July 16 nü Assam Rifles-i arishi küm 14 tain Tüzali aser arishi küm 13 tain Aso na kahset aser mashisa aliba tetsür Vitsürho Esther (24) kanga mejungi yirutsü.
Iba lendong nung asür kaketshirtem bilemteta Naga Students’ Federation (NSF)-i Honibar nikongtsütsü Phoolbari, Kohima nung candlelight service ka ayongzüka agi.
July 16, 2015 nü Meluri sub-division kübok Wuzu yimdak public lennirtem aser kinüngertemi Assam Rifle dang parnoki kahsetba NSCN(K) züngsemtem indang tasümang mepishia meshizükba mapang AR sepaitemi iba tesen nung adenshia alirtem dak injang kahloktsü.
Taonung ayongzüka agiba sentong nung Naga Hoho President P. Chuba Ozukum, Naga Mothers Association Advisor Prof. Dr. Rosemary Dzuvichu, NPMHR General Secretary Neingulo Krome aser NSF President Subenthung Kithan nungertemi tasür kinüngertem aser Pochury nunger den külemi timtem lemsateper ta metetdaktsü aser Nagaland state nungi Armed Forces Special Powers Act aser Disturbed Area Act agientsü atema parnokisa takhangba agütsü.
Iba lendong ataloker küm ka süiaka State sorkari Inquiry Commission indang osang yimjak nung memetetdaktsüba atema parnokisa sorkar dang mepelaba metetdaktsü aser state sorkari tekaratiba nung iba dak sendakba ken o bushisüngdangba tembangtsü atema takhangba agütsü.
Chuba Ozukum-i sentong nung o jembidang, India nunger sepaitemi Naga nunger dak taochi mesayui reshikangshiba aser ozüng alema mapa tamajung inyakba indang jembi.
“Islamic linüktemi kiralongra mapa inyaker ta India-i tai tongloktsür saka par sepaitemi kiralongrar aser Islamic linüktemi inyakba mapa dang nungi tamajungba inyaker. Naga nungeri nüjiso atema inyakba mapaji telungpur mesüra kiralongraba mapa ta India-i mezüngshitsüla” ta Chuba Ozukum-isa ashi.
Paisa, Nagaland nung ita trok atema DDA atsülangba aija jembidang, item ozüng tesashitem ajanga India sepaitemi tai maket public tem reshikangshir, ta ashi.
“India-i asenok Naga nunger taginüba magizüktsü akok saka asenoki alizüng atongtsü atema maneni inyaktsüla” ta Chuba Ozukum-isa ayongzük.
Sentong nung Prof. Dr. Rosemary Dzuvichu-i o jembidang, enquiry commission dang kuli sayutsü atema Pochury nungertemi affidavit ka nung iba tatalokba indang osang tejangja zülur agütsü nung ajungtsü, ta tebilemba ka lemsatep.
“Asenoki kobika yamai liyonga aotsü. Asenoki item lendong anendaktsünüra Naga loktiliba tema nungi telong tashi melenshitsüla. Sorkari mapa inyak tenzüktsüla aser ochimashi inyakyim anentsüla, public-i aitsüba yimya anentsüla aser mapa inyaktsüla, Centre den ceasefire aliba Naga yimten teloktemi nübor dang parnoki inyaktetba mapatem sayutsüla” ta Neingulo Krome-ia ayongzük.
Subenthung Kithan-ia ashiba agi, India sorkar aser Naga nunger tsüngda yimjung maparen teinyakdak lir, anungji temulung lemtepba aser tamang katepba tensa raksatsüba sentong ajak agientsüla.
Assam Rifles-i iba sentong magidaktsütsü atema tenokdangba agütsütsü merang saka parnoki takok mangu. Wuzu yimtsüng nunga kasa mapang nung sentong ka ayongzüka agidar, ta NSF General Secretary Boveio Poukai Duo-i adenshia alirtem dang ashi.
Sentong nung Send Choir-i tetushi agütsüba ken ka aten, Chakhesang Baptist Church ministers’ Hill Senior Pastor, Rev Dr Vevo Phesao-i sarasadema tasür nem tetushi agütsü aser Sumi Baptist Church Associate Pastor Nitoshe Zhimomi-i sentong tembanga sarasadem.