Wuzu tatalokba atema sorkari JIG ka tentetogo

Dimapur, August 12 (TYO) : July 15, 2015 nü Meluri nung lendong atalokba bushisüngdangtsü atema state sorkari Judicial Inquiry Committee ka tentetogo aser iba nung Justice B D Agarwal (Rtd) chairman aser Veprasa Nyekha, Dictrict & Sessions Judge (Rtd) züngsem asütsü.
Iba luden yagi tila tanur ana khasetba aser tetsür ka yirutsüba indang kulitem, nisung khasetertem aser iba tatalokba ya paitoktettsü lenmang liasü asü ta asüba kulitem bushitsü.
Sorkari shimteta mapa nungloktsüba ludeni iba sangdong agütsüba sülen ita ka tsüngda sorkar nem bushitetba osang sangoktsütsü aser luden indang Headquarter ji Chumukedima asütsü.
July 15, 2015 nü Meluri Sub- Division, Phek District kübok 46 Assam Rifles aser 12 Para Commando temi NSCN (K) pur den khatepdang nisung ana khasetba sülen tasümang bener Meluri Police station-i aodang lendong atalok.
Parnok Wuzu yim tonga aodang Wuzu, Old Phor aser New Phor yimer ketdangsertemi Wuzu yimer Capt. Puhachu mang meshizük saka sepai tanishisangi ibaji magizük.
Sepaitem mapang tatsüka Wuzu yimtsüng nung anenzükdang ajungbena injang khatok aser idangji kaketshir ana, Phor yimer Siikhaho’er jabaso Tiizali aser Wuzu yimer T. Yeteli’er jala Aso na khaset aser ano Wuzu yimer Riitu kinüngtsü Mrs. Vitsiirho Esther yiru.
Iba lendong nung tila tanur ana khasetba aser tetsür ka yirutsüba indang osang balala lir aser iba jagi state sorkari iba tatalokba atema Judicial Inquiry Committee ka asütsü tetemsü ta angateta luden ka shima mapa nungloktsür.