WW-II mapang amshiba tayimtsü abenba jahaz ngutetogo

Washington,Metsüremi 06 (Agencies) : World War II mapang tzüyim telungi luadokba US nunger tayimtsü abenba jahaz tenüng agi, USS Lexington teraksaji ngutetogo, ta iba jahaz bushir telok nung tanishir, Microsoft co-founder Paul Allen ajanga metetdaktsü.
Raksar aliba iba jahaz-ji Amungnü (par mapang) Australia tzüyimküm anüdoklen tsütsü nungi kilometer 800 shi pilar tzü telunglen kilometer ana shi lur aliba tesem ka nungi ngutetogo.
Iba jahaz bushir teloki Lexington noksa aser video dena yokogo; iba jahaz ya tayimtsü abenba US nunger jahaz mezüng rongnung ka liasü.
Parnokisa jahaz indang shilem balala, tenüng zülua aliba plate, tayimtsü kazüka yokba prangpongtem indang noksa yokogo.
1942 küm May 4-8 tsüngda Japanese aircraft carriers asem den USS Lexington aser US aircraft carrier tenüng agi USS Yorktown kanga sashia rara. Iba rara dangji Battle of the Coral Sea ta tenüng agüja lir; tayimtsü abenba jahaz tsüngda ibaji mezüngbuba rara liasü.
USS Lexington tzüyim telungi aluba mapang idakji tayimtsü 35 bena liasü. Kanga mejungi raksar asünung tongpang tembangba sülen tanga US warship kati metetsümonga Lexington-ji tzüyim telungi ludaktsü. Lexington nemji “Lady Lex,” ta ano nüngja tanga ka agüja liasü.
Raradang jahaz nung alirtemji noklang ana dak tema tepset saka Lexington-ji tzü telungi maludang nisung teimbaka tanga jahaz ka aruagi kümzük.