WW-II sülen küm 70 lir Japan aser Naga nunger yimjung yanglutsü

Kohima, November 18 (TYO) : Alima Rara Tanabuba mapang Japan-i India amakdang Kohima nung rara aser iba sülen küm 70 süir Japan aser Nagaland nungi arogotemi Nagaland nung tai nangzüktepba aser yimjung yanglutsü atema sentong agitsü.
Iba sentong dang Japan-Naga Reconciliation and Revival Summit ta ajar aser All Japan Revival Mission (AJRM)-i ketdangsüa ayongzüker. November 28-29, 2015 nung Nagaland nung telemsa pezü – Baptist, Protestants, Revival aser Assembly nungertemi acha-ayanga Kohima nung agitsü.
Iba sentong nung adentsü atema Japan nung Khristanpurtemi AJRM ajanga züngsem 32 agi akümba teshimtet telok ka yoktsü. World War II mapang Naga nunger dak tashiyim mapa inyakba asoshi parnoki iba sentong nung tatok meshitsü aser iba denji asentenshi aser yimjung yangluba mapang alitsü, ta Summit organising committee Convener, Rev Rachülie Vihienuo-i osangbener dang ashi.
Bodbar nikongtsütsü NBCC Platinum Hall nung osangbener senden ka jazüka alidang Rev Rachülie-i ashiba agi, iba sentong ya Japan nunger atema dang masü saka Naga nunger atema tongtipang lir.
Iba mapang Naga nungertemi WW-II nung Japan nunger anema mapa inyakba atema tatok meshitsü mapang tajung lir, ta paisa shisem.
Japan sorkar nungia iba mesükba mapa inyaktsü imlar asü koda ta osangbenertemi asüngdangdang, Rev Dr Kethozelhou Keyho-i ashiba agi, “Sorkari meinyak nunga, arogoi komo tejen aneptsü atema lenji arura, pelashishia agizüktsü.”
Iba sentong aliba nung yimjung yangluba aser tatok agütsütepba indang official kuli karbo alitsü asü malitsü ta asüngdangdang, “Japan aser Naga nunger tsüngda tesentaktep yangluba nüngtem nung Laishiba melenteptsü saka sorkar jenjang nung kulikaket nung tamaitsü tenüng zülutepbabo malitsü” ta Rev Dr Keyho-i langzü.
Iba Summit nung Japan AJRM nung Tir, Rev Dr Paul K Ariga aser Shinshiro Church, Aichi, Japan, Senior Pastor, Rev Jun Takimoto nati o jembitsü aser Nagaland Chief Minister TR Zeliang o State Assembly Speaker Chotisuh Sazo natia salem osang abentsü.
1944 küm Second World War mapang Battle of Kohima ajanga Japan nunger India amakba mapa nung tetsükdaktsü tulu ajuru. Iba rara ya April 4 nungi June 22, 1944 tashi Kohima temeket nung shilem asem lemsar rara.
Japan-Naga Christian Reconciliation & Revival Summit ya November 28 anepdang 10:00 ako nung Khedi Baptist Church nung alitsü aser November 28 & 29 nikongtsütsü 3:00 ako nung NBCC Convention Center revival meetings alitsü.
Khedi Baptist Church nung agiba sentong nung tejaokertem dang adentsü aser NBCC Convention Center nung agiba sentongtem nungbo nisung ajaki adentsü akok.