Xavier Rutsa mangayimer

Dimapur, Aami 12 (TYO): Anojungi Kohima Press Club (KPC) tir aser The Times of India correspondent, Xavier Rutsa, Aami/June 11, 2018 anogo asüba osang angashia aoksar, ta Nagaland Wrestling Association (NWA) ajanga sangdong ka nung metetdaktsü.
Asür Xavier-i Wrestling fraternity aser talisa Nagaland Wrestling Association (NWA) asoshi mapa tajung inyaktsüba asadangtsü makok, ta NWA General Secretary, Vekhozo-i sangdong ka nung ashi.
Pa ya takotet osangbener ka liasü aser pa wadang nung nendaka inyakba nübu tajung ka liasü, ta kasa sangdong nung NWA ajanga ashia lir. NWA-i pa mapa tajung kodanga mamadoktsü aser pai doktsür aoba kinunger aser adianutem den NWA-i asükhu lemsateper, ta kasa sangdong nungsa shia lir.
Medemer tajung, asür Xavier Rutsa anujungi iba lima nungi pilaba osang angashia kanga sasar, ta Adviser to Chief Minister, Abu Metha-ia sangdong ka ajanga ashi. Pa iba lima nungi pilaba ajanga nüburtemi kanga junga meteta aliba nübu tejangja ka samaogo, ta pai ashi.
Asüri yutsür aoba kibong aser media fraternity nung medemer ajak den asükhu lemsateper, ta Adviser to CM-isa metetdaktsü.