Xi-i Asia-Pacific Summit nung shilem agitsü

Beijing, November 09 (Agencies): China Tir, Xi Jinping-i taruba hopta amentsü ayongba Asia-Pacific Economic Cooperation (APEC) senden nung shilem agitsü asoshi sentong renemba osang ka China Foreign Ministry-i tanü Hombar nü metetdaktsüogo.

Kidangsüa aliba Philippines linük den South China Sea den sentakba ken o benoka tensa mejungi liaka, Xi-i tan APEC senden nung shilem agitsü sentong renemer lir.

APEC senden ya Philippines kübok Manila yimti nung tan November 17-19 nü tashi amentsü ayonga lir.

United States, China, Japan, South Korea, Indonesia aser Canada nunger züngsemba APEC teloki alima ajunga nung osettsüset adokbaren noklang nung shilem 57 tashi adokba aser alima shishilembabaren nunga noklang nung shilem 46.5 tashi inyakba osang bushiteta lir.

Kümshi dollar sen trillion 5 shi jenjang aketba osettsüset abenba rongtemi ajangdangba South China Sea den sentakba ken o ya China-i Philippines den külemi, Vietnam, Malaysia, Taiwan aser Brunei linüktem dena tang adoka lir.

Taoba hopta amenba Association of Southeast Asian Nations senden nunga South China Sea den sentakba mangatettep ken o mebentetti tembangba osang bushitetogo.