Xi-i Egypt den tongti shishilembatsü tezüngzüktep ishika agiogo

Cairo, January 21 (Agencies): Middle East nung tentetba linüktem den rongsenren tesendaktep tajung ayutsü nükjidong ayusang, China Tir, Xi Jinping-i Egypt linük den tongti shishilembatsü tezüngzüktep ishika tanü Brehostibar nü agiogo.

Yashi nikongtsütsü Saudi Arabia toktsür Egypt tonga aosang, Xi-i tanü Egypt Tir, Abdel Fattah al-Sisi den ajurutepa par linük ana tsüngda shishilembatsü tezüngzüktep 21 tashi agiba den külemi, pai Cairo nung amenokba Arab League senden nunga onük jembia liasü.

Electricity, transportation, agriculture, civil aviation aser housing sectors densema Xi o Sisi nati tan dollar sen billion 14 shi jenjang aketba tezüngzüktep agiba osang jangjaogo.

“Egypt-i pei pasasa pei madak yimsü asütsü temeten kümzüka ayutsü aser bendanger nem par kibok ken o nung teka mamamokdaktsütsü maparen nung China-i Egypt nungita pusemtsü melunga lir. Egypt-i regional aser international sabang nung tongti shilem agiba mapatongtema ozü China-ia nungiter,” ta Xi-i tanü metetdaktsü.

China Tir menden benokba sülen tan mezüngsüa Middle East tsüngdong semdangsang, Xi-i Cairo semdangtsüren tembangba sülen maneni Iran linüka semdangtsü sentong renema lir.

Alima tashi abenba linüktemi Iran anema benokba tenokdangba sentongtem agiener anogo ishika lir külen Xi-i asüng, Hokolbar nü Iran semdangtsü sentong renemer lir.

Par linük anema benokba tenokdangba sentongtem agientsü melena Iran-i par nuclear mapatong anentsü tenzüngzüktep agiba alima tashi abenba linüktem rong nung China linüka densema lir.