Xi-i lendong tesem, Xinjiang nung ‘Great Wall of Steel’ yangluner

Beijing, March 11 (Agencies) : China Tir, Xi Jinping-i linük nung telongjem wazüka ayutsü aser sobaliba balala kümzüka ayutsü asoshi lendong atalokba tesem, Xinjiang nung “Great Wall of Steel” yanglutsü kanga anunger.
Xi-i iba o ya Hokolbarnü tang temendak National People’s Congress (NPC) senden nung Xinjiang yimsüsürtem den olemtep akaba mapang ashi, ta osangbenertemi metetdaktsü.
Xi-i, linük nung military aser sorkar tsüngda, sepaitem aser nüburtem tsüngda aser police aser nisung ajak tsüngda tebensa malitsüla, ta ayongzük.
“Xinjiang ya China anüdoklentip tsütsü anüolen kanga dang tongtibang security tesem ka lir aser iba tesem nung tatalokba balala agi kongshir. Anungji iba tesem nung kanga junga yimsü süra temelenshi tajung adoktsü,” ta Xi-i ashi.
Iba lendong atalokba tesem süngjema kümdaktsütsüji yimten mapa lir, ta pai kanga shishia bilema ashi.
“Teinyaktsü tim shitak mapang shitak nung aser yimya shitak nung inyakba ajanga tensa junga akümtsü,” ta Tir-i shisem.
Raradang amshiba oset teperi bener sepai meyirjang aikasa iba tesem nung oa lir aser parnoki kiralongrartem den raratsü tenangzükba agir apuso.
Tan ita tetenzüklen Islamic State-i China nunger communist tem azü tokshitsütsü indang video ka online ajanga proka liasü.
Xinjiang anüolentip tsütsü December ita nung kiralongrartemi Communist party indang ki ka poksatsütsü lia security temi item telungpur pezü tashi tepset.
Ano February ita nunga nisung kar nok agi tepsetba osang angashiba sülen telungpur asem tepset, ta osang kakettem nung shia lir.