Xi-i Vietnam PM, Phuc den ajurutep

Beijing, September 13 (Agencies): China Tir, Xi Jinping-i Vietnam Ato Kilonser, Nguyen Xuan Phuc den China yimtiba, Beijing nung tanü, Mongolbar nü ajurutepa senden amenba osang jangjaogo.
“Asen linük anati tsüngdong ajurutepa jembitepba senden amenba ajanga asen linük ana tsüngda adokba South China Sea (SCS) den sentakba mangatettep ken o bentettsü imlar,” ta shia, China aser Vietnam na tsüngda adokba mangatettepbaren dang nungi par linük anati aroki lungjemba ajanga tajangzük timba angutsü olen ka Xi-i tanü lemsatepa liasü.
Küm shia dollar sen trillion 5 shi jenjang aketba shishilembatsü osettsüset abenba rongtem ajanga süidak, SCS tzüyim shilem tuluba ka par meyong ta China-i züngshir aser par linüki iba tangatetba ayuba ajanga Brunei, Malaysia, Philippines, Taiwan aser Vitenam densema, kidangsüa aliba linüktem den mangatettep ken o tulu adoka lir.
China-i SCS nung par mitkar mapatong kanga sashia inyakba anema nokdaktsü tangatetba nung Vietnam-ia par tzüyim shilem nung mitkar mapatong ola madoki inyaktsü tenzükba osang bushiteta lir.
Ano külen, Philippines linüki benokba SCS ken o bentettsütsü onük agizüka angadangba sülen United Nations (UN)-i tentetba Court of Arbitration-i Beijing-i SCS shilem tuluba ka par meyong ta züngshitsü temeten ngua mali ta o bendang ita 1 tejaklen agütsü saka China-i iba o bendang magizüki lir.
Yimjung sentongtem ajanga par mangatettep ken o angatetteptsü tangatetba nung Philippines den pusema, Vietnam-i UN okadaki agütsüba o bendangji agizükogo.
“China aser Vietnam nati mangatettepbaren ajunga angatetteptsü lenmang ngutettsü aser asen linük anati aroki lungjemer tzüyim den sentakba mapatong balala inyaktsü jangrar,” ta Xi-i tanü senden nung metetdaktsü.
“Asen linük ana tsüngda adokba mangatettepbaren dang nungibo asen linük anati aroki lungjemba ajanga tajangzük timba angutsü,” ta Xi-i nenshia ashi.
SCS ken o benokba linük lenirtemi tsüngdong ajurutepa senden mena angatettepba ajanga tzüyim den sentakba mangatettep ken o bentetba den külemi, par linüktem rong nung amalitep lia nungdakba mapatong balala inyaktsü maongka angutsü imlaba olen ka Xi-isa metetdakja liasü.
Phuc-i Tir Xi den ajurutepa senden amenba jakdang China Ato Kilonser, Li Keqiang dena yashi, Hombar nü ajurutepa senden amenba osang angazükogo.