Xi Jinping tanabenren Tir inyaktsü shimteter

Beijing, Metsüremi 17 (Agencies) : China nung ‘rubber-stamp’ ta jalokja aliba parliament nung züngsem ajaki mulunga Xi Jinping nem tanabenren Tir inyaktsü atema shimtetogo aser iba denji külemi pa den külem ser inyaksang, Wang Qishan nem Tadong Tir inyaktsü atema maongka agütsügo.
Tena nem tashi tulu agüja lir asünung tena longjemer inyakba ajanga US nungeri shishilembabaren tsütsü amkomerenba ajakji takok ngua anepalutettsü ta nüburtemi temulung lemteta bilemer.
Communist Party-i amokbanger aliba tatartemi Xi nem iba maongka agütsütsüji meteta dang liasü saka taoba nung ochimashiba maparen anema nokdaksang, Wang Qishan nem Tadong Tir mendenji agütsütsü asü masüar mejangjateti liasü.
Tir menden aser Central Military Commission chairman inyaktsü atema Xi-i vote ajak angu (2,970 votes) aser iba mapang senden nung adener ajaki nokdaker akümtsübu agütsü. 2013 kümbo pai vote 2,952 dang angu; pa anema vote agütsür ka liasü aser nisung asemi vote magütsütet; ibaji vote noklang shilem nung 99.86 liasü.
Wang nem vote magütsürji ka dang liasü aser paia vote 2,969 angu.
Takok anguba sülen Xi o Wang na salemtepba mapang tatartem ajaki teka malokja liasü.