XXVII MusicFest tenzükogo

Mokokchung, Luroi/August 03, 2018: Mapang talangka nungi yongyaa ataba Mokokchung Town nung MTBA Youth Department indang  XXVII MusicFest ya yakonung tenzükogo.

Iba sentong ya theme song “Kotaker Yimyim” ajanga tenzük aser iba ken ya Tongdentsuyong Youth Fellowship ajanga aten. Iba sentong nung ken genre balala nungi kensü ola balala nung nüburtem mulung ajungmesoa liasü. Iba sentong nung chorals, ken, instrumentals aser musical play tema agi Tsüngrem sentsüwangshidakja liasü. Kasa sentong nungsa Nagaland nungi kongki atemer tajung, Xhavie Whourie, The Great Decade aser The Refiners nungertemia shilem tajung agia liasü.

Iba sentong ya MTBA Asso. Pastor, Temsuwati-i moaja lanurtem dang Tsüngremi moatsüba sempet amshia Pa sentsüwangshidaktsütsü ayongzük. Kasa sentong nungsa anasa aliba Arogotem – Alempang Youth Department aser Sungkomen Youth Department – nungia shilem tajung agia liasü. XXVII MusicFest ya Debolina Mukherjee-i ketdangsüa agi.