Y. Kikheto Sema-i doctor aser health worker tem ajuru

Dimapur, Chiteni/July 01 (TYO): APC aser COVID-19 dak sendakba inyakyim nung Dimapur in-charge, Y. Kikheto Sema-i July 01, 2020, World Doctor’s Day nung Chief Medical Officer (CMO) office, Dimapur nung doctor aser health worker tem ajurua iba anogomung salem doctor tem den lemsatep.
CMO office nung doctor aser health worker tem den sensaksemba mapang, COVID-19 tashidak wara agi alima sünger timtema liaka state nung doctor temi nüburtem tenzükba nung mapa tajung inyakba atema Kikheto Sema-i doctor tem nem tenüngsang agütsü.
Doctor aser nurse tem dena health worker ya ajaki akhumtsüpuba nisungtem lir aser parnok mapa ya wadang ajak dang tajungtiba asünung, Kikheto Sema-i Dimapur medical tema dang pelaba metetdaktsü, shirnoki tesüiba ita asem state nung coronavirus agi timtema arudang taküm bendanga agütsür nübur tenzüka arur.
“Tsüngremi kotak tenyar yanglu, saka kotak tenyartem ya tesem ajaklenbo melitet asünung Pa nütsüng nem taneptsü agütsütsü asoshi Pai doctor tem mezüja shimtet. Aser tang tashidak wara agi alima sünga prokshir lia alimai kotak tenyar nüngdaka alidang doctor aser nurse tem yakpang sür iba virus prokshia aoba azüoktsü mechi timtem jenti arema inyaker,” ta pai ashi.
Pai Dimapur medical team dang alakteta pelaba lemsatep, kechiaser parnoki danga state nungi anendaka aliba Naga nungertem meyipa shildang dang kanga junga ketdang süa liasü.
Tzüngluruwa arur asünung doctor aser nurse tem ano tzüngluruwa dak sendakba shirangshiko den raratsü, aungji temang tanüla ajunga renemshia alitsü pai ayongzük.
Iba senden nung CMO office nung aliba doctor aser medical staff temi timtem aser metokmeperi ajangshibatem lemsatep aser APC-i itemji department tekolakpur den jembitsü ashi.