Y.M. Yollow-i Nagaland Dobashis’ Association mungdang lapoktsü

Dimapur, February 17 (TYO) : February 17, 2016 nü Council Hall, Mon nung Nagaland Dobashis’ Association 19 buba Lokti Senden agi.
Iba sentong nung tongti tesemdangerji CAWD Parliamentary Secretary, Y.M. Yollow liasü aser Mon Deputy Commissioner, Honje Konyak NCS-i tetushi tejaoker ama shilem agi.
Dobashi temi British sorkar, Assam sorkar aser Nagaland sorkar tenzüka aru aser ketdangsüba nung Dobashi temji tongtiret ama lir. DB temji sobaliba temzüng-ozüng amertem lir aser sorkar o public tsüngda tiyogtsü nung inyakertem lir. Anungji DB temi ozüng kanga junga meteta alitsü tim aser pei inyakba wadang nung ochishia inyaktsü ayongzüker, ta Yollow-i tongti tesemdanger o jembidang ashi.
British nunger yimsüsüba mapang DB temi yimjung bener aru aser mapa kanga junga inyakba ajanga British nungeri DB temji ketdangsertem ta züngshi. Tanü DB temi tesüiba tatalokba nungi angazüka Nagaland nung tensa tajung lidaktsütsü atema mapa inyaktsü ayongzüker, ta tongti tesemdangerisa metetdaktsü.
Iba sentong nung Longleng District DB’s union-i tongti tesemdanger pela agizük aser Phek District DBs o Wokha District DBs-i sobaliba ken aten.
Sentong nung Rev. J. Tenwang Konyak, District Chaplain-i temoatsü meshia sarasadem aser Wangkem Konyak PA to DC, Mon-i tesentepertem pela agizük. Sentong nung mendenji S. Hovito Zhimo, Joint Secretary, NDBA liasü aser Ao Baptist Arogo, Mon sannükeri tenüngsang agüja sarasadem.