Y. Patton-i asür Kiyanilie anema jembiba atema tatok meshitsüla

Dimapur, September 30 (TYO): September 29, 2017 nü Home Minister Y Patton-i Konyak nunger Lao Ong Mo benjungmung nung o jembidang ozü lennir asür, Kiyanilie Peseyie indang jembisemba atema kanga aoksar aser aitsür, ta Naga People’s Front (NPF), 8th Western Angami A/C sangdong ka nung metetdaktsü.
Asür Kiyanilie asüba ajanga par teloki takok angutsü ta Patton-i jembi aser iba ya ajanga pai ozü lennir asüba atema pelaba aser jangra atemba kuli sayur, mesüra pai iba ama sabang ka nungi taoksatsü aketba olen ya mejembila, ta NPF, 8th Western Angami A/C tir Votso Peseyie-i sangdong nung shia lir.
Meimchir ajak ya alimai tasütsü atema dang aru ta asenoki meteta lir, saka asenoki nisung asüdang mangyimer. Ozü lennir sür mangyimba mapang aser lepku ano memongtemi lia, Patton-i ozü lennir asüba atema pelaa o jembibaji onoki magizüker, maremzüker aser tatok magütsütsü, ta Votso Peseyie-isa sangdong nung metetdaktsü.
Küm 10 jungnüa sorkar nung külemi inyaksema aruba nisung ka asüba atema aria mebilemi Y Patton-i Mon nung tasür anema jembiba ajanga pa indang tangatetba tamajung aser tesempatsü yimya sayuogo. Iba onük ya Chief Minister TR Zeliang lia jembi asünung, pai Home Minister dang asür Kiyanilie Peseyie’er kibong aser pa meimertem dang yimjak nung tadok meshiang ta tetuyuba agütsütsü akhanger. Yamaji mesüra Chief Minister-i Home Minister tenüng nung tadok meshitsüla, ta Votso-isa ashi.