Y Patton-i DGP Nagaland melentsü merangba magizüker: NPF

Dimapur, (Rongchii) April 10 (TYO): Deputy Chief Minister aser Home Minister Y Patton-i Director General of Police, Nagaland melentsü merangba atema Naga People’s Front (NPF) kanga aoksar, ta Press Bureau sangdong ka nung metetdaktsü.
Iba ya DGP-i Police department nung back door appointments memulungba atema asütsü akok. Y Patton-i inyakyim alema nübotem shimokba aser contract o supply mapatem pai mulunger nem dang agüja arur. Taoba sorkar mapang pai mashilen mapa inyakba atema maaksü bentsür aru aser iba jagi pa Ministry nungi anenja liasü, ta NPF-i ashi.
Iba ama nisung ka nem PDA sorkari Home lemzüktsüba atema kanga shisabulua liasü aser tang DGP Rupin Sharma, IPS ama tetemsü ketdangser ka mapa nungi anentsütsü atema inyakba ajanga Y. Patton-i indang tebilemba tamajung kuli adoka sayuogo, ta parnokisa shisem.
Rupin Sharma, IPS ya tejak mereprangi Nagaland nung DGP inyaktsü atema shimba ketdangser ka lir. Pa ama tetemsü ketdangser kati ozüng nung aliba ama inyaktsü ta temulung lemteta shim. Rupin Sharma-i Police department nung temelenshi aika bener aruogo aser pai nübortem den aser talisa social media ajanga sensotem sen sensaksema mapa inyaka arur, ta NPF-isa metetdaktsü.
Y Patton-i DGP melentsü atema inyakba mapa ya PDA sorkari anendaktsütsüla. Talisa pai Union Home Minister dangi ashiba onüktemji tametdak mali aser pa ajungtsü asaa inyakba ka dang lir, ta parnokisa shisem
2006 küm Supreme Court nung PIL ka nung Prakash Singh Vs Union of India indang ken o nung “State ka nung Director General of Police ka mapa inyaktsü shimba sülen, pa mapa nungi anisüngzüktsü liaka pai küm ana kümsük bosa inyaktsüla” ta oshidang agüja lir aser ibaji PDA sorkari temulung nung ayutsüla.
Rupin melena tangar ka shimang ta tenüng teta ashiba ketdangser anema NPF-i kecha tamajung tebilemba mali. Ajisüaka, Deputy Chief Minister/ Home Minister-i tangatetba tamajung nung iba mapa inyaker asünung nübo melenba ajanga department mesüra state atema tajung kecha madoktsü, ta NPF-isa metetdaktsü.