Y Patton-i kidanger state tem ayongzüker

Dimapur, November 1 (TYO): Indo-Naga yimten olemtep tatembang kati arutsü atema India sorkar aser NSCN-IM o NNPGs tsüngda angatettepogo aser iba ajanga Naga nunger aliba luitsü litsü ajak nung yimjung aser tesünep bener arutsü, ta Media Cell Dy. C.M.O indang sangdong ka nung metetdaktsü.
Iba mapang Dy. CM aser BLP leader-i Nagaland BJP tenüng nung Assam, Manipur aser Arunachal state tem dang Prime Minister Narendra Modi aser Union Home Minister & National BJP President Amit Shah nati northeast ajungalen yimjung bener arutsü atema inyakba mapa nung yariteptsü mepishir, ta sangdong nungsa ashi.
Indo-Naga yimten ken o ya küm neter tema jembia arur aser tanü Prime Minister, Narendra Modi aser Home Minister & National BJP president Amit Shahi na lenisüba kübok NDA sorkari alizüng tulu yur inyakba ajanga olemtep tembangtetogo, ta Media Cell sangdong nungsa shia lir.
Indo-Naga tenangzüktep tatembangba nung sign asüba nung kidanger state temi yariteptsü mepishir, ta sangdong nungsa metetdaktsü.