Y Patton-i Mangkolemba ADC office tasen lapoktsü

Nagaland Home Minister, Y. Patton-i Mangkolemba ADC office ki tasen lapoktsür külen par külem medemertem aser sorkar ketdangsertem den office kilem nung külemi tangokba noksa angur.

Mangkolemba, Nov 13 (TYO): Hokolbarnü Nagaland Home Minister, Y. Patton-i Mangkolemba Additional Deputy Commissioner (ADC) office ki tasen ka meraketa lapoktsüogo.
Shitakba agibo tanü ya Nagaland Chief Minister T.R Zeliang arutsüba liasü, saka pa ajungben temang nung timtem kar ajuruba ajanga pa marutettsüsa kümadok. Aji süaka, pa melena pai meyonger par külem minister yoka renema aliba sentong ajak tiptema aser takok ngua agiogo.
Tanü iba sentong nung home minister, Y.Patton den ano par külem medemer Deputy Speaker Imtikümzük Lkr, power minister Kipili Sangtam, Parl. Secretary CAWD Yollow, Parl. Secretary Municipal Affairs Tohanba, Parl. Secretary Agri Dr. Benjong, Adviser T.M Lotha, MLA Dr. Longri, MLA Merentoshi R jamir njungertem den ano Nagaland Commissioner Sentiyanger Imchen IAS aser sorkar tongti ketdangsertem aika densema liasü.
Tongti tesemdanger Y. Patton-i tanü iba sentong nung jembidang, pa aruba temaitsü Mangkolemba tang koba SDPO jenjang nung lir ibaji Additional S.P jenjang ajungkettsütsü aser Longnak junction nungi Mangkolemba tashi lenmang Kilometer 12 yanglutsü merangtsü ta Mangkolemba public ground nung sentong ka agidang metetdaktsü.
Mangkolemba sub-division ya arrtsü anasa asünung, arrtsü dak sentakba nung temulung agütsütsü tebilemba lir ta paisa inyaka aotsüba maparen kar lemsatep.
Paisa peace accord dak sentakba onük bener arudang, Naga yimten dak sentakba nung koba India sorkar o Naga nunger na yimjung kishi lapoka tezüngzüktep ka yangluogo, aji oda, iba tebilemtsü ya tekaratiba nung latettsü asoshi Naga nunger lungjemdaktsütsü merangtsüla, ta ayongzük.