Y Patton-i Sanuorü Bridge mapang shitak nung yangluzüktsü tuyur

Kohima, July 31 (TYO): Nagaland nung mezüngbuba four-lane arch bridge yangluba contractor tem dang mapang lateta aliba tsüngda iba mapa tembangang ta tanü Nagaland Deputy Chief Minister, Y Patton-i tetuyuba agütsü.
Deputy CM Patton-i Roads and Bridges department ketdangsütsü mapa agizükba sülen tanü iba apu yangludak semdangdang tetuyubaji agütsü.
Dy CM Y. Patton-i Home mapa bena lir aser July 23 nü Chief Minister Neiphiu Rio-i pa nem Roads and Bridges mapa agütsüsema liasü.
Sanuorü ayong ajangdanga yangluba apu ajanga State Civil Secretariat aser Kohima jila sendakteper. 2016 tzüngluruba mapang iba lenmang raksaja liasü.
Tanü Deputy CM-i apu yangluba tesem semdangdang, contractor tem dang mapa inyakba nung temulung asüba metetdaktsü aser March 2020 tashi nung tembangtsü ayongzük.
Iba apu ya Rs 20 crore Central Road Fund ajanga yanglur ta Roads & Bridges Department nung Chief Engineer Limanaro-i ashi.
Centre-i sen ano magütsü saka contractor tem- Vilelie Khamo aser KC Angami nati senotsü teyari kecha menguaka mapa inyakdar, ta laisa ashi.
Iba mapa ya mapang agir kechiyong ayongtzü ayimba melenshitsüba den taküm May ita nungiang apu yangluba mapa tenzük. Iba denji tzüngluruwa asüba agi mapang shia anentsüh timtem ajurur, ta Er. Limanaro-isa shisem.
Tanü osangbenertemi Dy. CM Y Patton dang Kohima jila nung lenmang yanglushidak kar nung ongkentem adoka aliba onük lemsatepdang “sorkar indang inyakyim tasen ajanga contractor-i lenmang yanglushiba sülen küm 3 tashi anepalutsüla” ta Paton-i ashi.
Idangji Chief Engineer Limanaro-ia Kohima Town City Roads yanglushiba mapaji tang teinyakdak lir saka tzüngluruwa ajuruba agi bitumen mamshiteter ta ashi.
“Onoki completion certificates ano magütsü, anungji ongkentem adoka tesemtemji contractor temi reprangtsüla” ta laisa ashi.
Razhü Point-D Block-Phoolbari road kanga mejungi aliba atema Er. Limanaro-isa ashiba agi ‘iba ya contractor tem tai masü saka tanga department temi lenmang tusaba sülen anepalu masüba ajanga lir.”