Y. Patton-i sorkar mapa inyakertem kümdangtsü tuyur

Dimapur, Luroi (August) 3 (TYO): Tebilemtsü mabenba sorkar mapa inyakertem nem tapet temerenshi agütsütsü ta tanü Nagaland Deputy Chief Minister Y. Patton-i ashi.
Luroi (August) 3 nü Wokha nung Lotha students’ union office lapoktsüdang Y. Patton-i “sorkar school tem nung quality education agütsütsü atema sorkari meranger saka sorkar school teimba kati nil result ang angur. Iba ya tesayurtem ajanga lir anungji kaketshir lennirtemi tebilemtsü mabenba sorkar tesayurtem dak tenük yoktsüla aser mittsüla” ta ashi.
Districts headquarters aser sub-divisions nung aliba department aika nüngdak mali kümogo aser ketdangsertemi temulung magütsüba ajanga public nem teyari magütsür. Anungji, district administration-i temulung agüja meinyakba department bushitsü aser sorkar dangi osang abentsü ayongzüker, ta paisa metetdaktsü.
Y Patton-isa NGOs aser civil society tem dang public tajungba tenzüktsü atema sorkar den amalitep alitsü aser yariteptsü atema ayongzük.
Sorkari aibelena inyakdang mesüra tamakok angudang public-i teti dangbo melulutsüla aser public atema inyakba atema sorkar dang pelar ta ashitsü yimya sübatsüla, ta paisa shisem.
Paisa, district administration aser Lotha nunger tongti teloktem dang Longsa gate nungi Mokokchung tashi national highway-2 anasa kiojen tasen meyangludaktsütsü atema mepishia ashi.
Nüngdak maliba nung temenok agütsüba ajanga terenlok mapa meinyaktettsü. Iba dak sendakba atema senotsü lemzüktsüogo aser tekaratiba nung mapa tenzüktsü, ta Deputy Chife Minister-isa ashi.
Forest Department-i office complex yanglutsü atema ali tenlaba atema kanga pelar aser LSU-i ali atsünga magitsü ayongzüker, ta Y patton-isa shisem.
Sentong nung Food & civil Supply, NSDMA and LM&CP advisor, Pukhayi-ia tajungshi o jembidang “Lotha nungeri tetoktepba wadang balala nung takok tajung ngua arur aser lanurtemi toktepba sobaliba meindoktsü ayongzüker” ta ashi.
Tanü Naga nunger melongjemba aser balala aliba ajanga tarutsü teimla mali. Anungji, asenok Naga nungeri tangatetba tajung nung ka küma alitsü merangtsüla, ta Pukhayi-isa ashi.
Tanü agiba sentong nung LSU tir Libemo Lotha-i tesentepertem pela agizük, taoba Lotha student union tir Subenthung Lotha-ia o tatsüka jembi aser LBES Executive Secretary, Rev. Nyanchumo Lotha-i LSU office Building meshiteta sarasademtsü.