Y Patton-i Sukrunye 2019 Mini Hornbill festival tenzüktsü

January 15, 2019 nü Phek nung 2019 Sukrunye Cum Mini Hornbill tenzükba sentong nung Zapami Cultural troupe-i shilem agidang tangokba noksa angur. 

Dimapur, January 15 (TYO): January 15, 2019 nü Phek jila nung Sukrunye 2019 Mini Hornbill festival tenzükogo. Iba sentong nung Sukrunye guest ji Deputy Chief Minister, Home & National Highways, Y. Patton liasü.
Iba benjung ayonga amungba ya tourism ajungkettsüba aser Nagaland nung Naga kin ajak nem maongka kasa agütsütsü atema lir. Maneni, local entrepreneur ajangzüktsü aser tangar dang sobaliba aser kin sayutsü atema benjung ayonga amunger, ta Y Patton-i ashi.
Paisa nübortem dang sorkari terenlok atema inyakba mapatem nung yariteptsü atema mepishi.
Sukrunye ya tongtipang benjung ka lir aser iba mapang nübortem meshiteta amunger. Anungji asen loktiba nung telongjem adokdaktsütsü atema asenoki iba benjung nung asenok taküm meshitetdi, ta Y Patton-isa ayongzük.
Lanurtemi asen Naga nunger sobaliba masü western sobaliba ajizüktsü kanga jangrar. Chakhesang nungertemi asen state tejakleni aoba mapa nung tajungtiba agüja inyakogo, ta paisa ashi.
Sukrunye benjung atema chief host ji Planning & Coordination and Land Revenue Minister, Neiba Kronu lir aser paia o jembidang “sorkari asen nübortem renlokdaktsütsü atema temulung agütsür anungji nübortemi iba nung yariteptsü ayongzüker” ta ashi.
Sentong nung mendenji Phek DC Orenthung Lotha liasü, Zhetoi Lohe-i Sukrunye temoatsü meshi, Chakhesang Cultural Research Institute, Chetheba (CCRIC)-i special presentation ka sayu aser CPO President, Zapami village-i Sukrunye teratet metetdaktsü.
Sentong nungsa Pochury cultural troupe, Kivikhu village cultural troupe, Tizu woman cultural troupe nungertemi sobaliba shilem agi aser Sukrunye guest Y Patton-i exhibition stalls lapoktsü.