Y Patton-i tai kecha meinyak

Dimapur, April 12 (TYO): 31 Riphyim Old-III Polling Station nung Nagaland Deputy Chief Minister Y. Patton-i tim masüba mapa inyak ta NPCC-i tai tongloktsüba atema Media Cell Dy.C.M.O-i telangzüba agütsü.
Parnoki ashiba agi Y Patton-i election dak sendakba teinyaktsü aser model code of conduct alema kecha meinyak.
Y Patton-i Polling Station telungi aiba indang Video Clip jungjunga reprangtsüla. Pai pa indang vote dak alaka tanga vote kecha menoktsü, ta Media Cell-isa ashi.
Patton-i Election Commission aser election teinyaktsü lateta alibatem kanga akhümtsübur aser iba onük atema ochi bushiba nung yariteptsü mulunga lir, ta parnokisa ashi.
Social Media nung kuli maliba aser tebilemba tamajung lia prokshiba Video Clip dak alaka 31 Riphyim Old-III nung polling tiptema dang agi aser shinga nungia temulung masüba onük kecha maliasü. Anungji NPCC-i re-poll asütsü akhangba atema kuli kecha mali, ta Media Cell-isa metetdaktsü.
Nagaland nung Lok Sabha Election tiptema agiba atema Patton-i Election Commissions aser Polling Personnel ajak nem tenüngsang agütsür aser pelaba metetdaktsür, ta Media Cell Dy.C.M.O-isa ashi.