Y Patton & Nuklutoshi nati asür Wt. Takatula mangayimer

Dimapur/Kohima, March 13 (TYO) : Nagaland Home Minister, Y Patton-i sangdong ka nung asür Wt. Takatula mangyimba metetdaktsü.
Odisha Angh aser taoba Nagaland Chief Minister, Dr SC Jamir o Urban Development, Adviser, S.I Jamir na tetsü aser Tourism Parliamentary Secretary, C Apok Jamir tetsü March 12, 2016 nü iba akümli toktsür aoba osang angashia temulung raksar aser lar kibong den asüku lemsateper, ta Y Patton-i sangdong nung shia lir.
Asür Wt. Takatula ji Tsüngrem akhümtsübuba nisung ka liasü. La kanga dang ajemalu taküm ka liasü aser la taküm otsü ajanga nisung ajak ayongzüker. Lai iba akümli toktsür aoba ajanga Aor asoshi dang masü saka Naga nunger ajak atema chichiba tetsü ka samaogo, ta paisa sangdong nung shia lir.
“Kü kinungtsü künati tasür kibong den asüku lemsateper” ta Y Patton-isa sangdong nung metetdaktsü.
Ano, National Highways & Mechanical Engineering Minister, Nuklutoshi-ia sangdong ka nung asür Wt. Takatula iba akümli toktsür aoba asoshi sasa bilemer ta metetdaktsü.
“Tsüngremi asür Wt. Takatula kanga moatsüogo. Lai jabasotem- Odisha Angh aser taoba Nagaland Chief Minister Dr SC Jamir aser Urban Development Adviser, SI Jamir na aser semchir Tourism Parliamentary Secretary, C Apok Jamir nunger amala takotet lennirtem sotetbaji tesüngmangtsüka. Tsüngremi la kanga moatsüogo aser lai sotetba lennirtemji Naga nunger puti otsü nung teti tetshitsü,” ta Nuklutoshi-i sangdong nung shia lir.
La taküm alidang lai meimchir aochiba aser ajemalu tangatetba sayuogo aser la takümji Naga nunger asoshi tangazükdak ka lir. Asür Wt. Takatula’er kibong den asüku lemsateper aser la teti anisüngzükdak ngudakjang ta sarasademtsür, ta Nuklutoshi-isa metetdaktsü.