Y. Vikheho Swu-i GHS Pughoboto nung HSLC exam centre lapoktsüogo

Dimapur, January 27 (TYO) : January 26, 2017 nü Pughoboto nung R&B Kilonser Y. Vikheho Swu-i Pughoboto ADC aser School Managing Chairman, Avelü Ruho lia Pughoboto GHS nung HSLC exam centre semzüka lapoktsüogo.
Iba sentong nung jembidang Vikheho-i, exam centre lapokba nükjidongji mapang aser rongsen kümzüktsü asoshi aser Pughoboto tenüng yanglutsü atema lir. Iba tenüng tajungji tesayurtem, kaketshirtem aser tsüraburtem senteper bena arutettsü, ta ashi.
Iba school tanaben shia arudaktsütsü asoshi ADC aser ketdangsertemi nüken belema inyakba atema Kilonseri pelaba metetdaktsü.
Pai, Pughoboto nüburtemi tangar dak nungi imlaba yimya intoker pei lokti asoshi pei-a langka tajung karbosa inyaktsü mapang tongogo, ta ashi.
Tesem nung terenlok mapa inyaktsü atema nüburtem temulungtetba tajung nüngdaker ta ashidang pai, school tenüng ajungkettsütsü nükla yur lesson kanga nendaka aser meranga bushir tatidangji agütsütsüla, ta iba centre nungi mezüngbuba tatidang agütsütsü purtem ajungshia liasü.
Pai kaketshir rongnung shibai top 20 nung takok ngudir parnok nem sempet agütsü dena nangzük.
Tarurtem pela agizükba o jembidang, Pughoboto ADC Avelü Ruho-i, terenlok mapa atema tashi temetet nisungtem nüngdaker aser ibaji kaketshisatsü ajanga arur, ta shisem.
Lai, R&B Kilonser-i kaketshir telok atema bilemtsüba asoshi tenüngsang agütsü aser mapa ajak nung teka amteteper inyakba ajanga takokji angur, ta ashi.
Lai NBSE-i iba centre lapoktsü atema nungita yariba atema pelaba lemsatep aser Pughoboto nüburtem dang kidanger yimtsüngtem nungi tatidang agütsüi aruba kaketshirtem nem takdang peria agütsütsü mepishi.
Aphuyemi Hobo, Tir Inavi Swu-i, SDPDB, NBSE aser Education Department-i Pughoboto nung nüngdaka aliba ataloktsüba atema pelaba lemsatep.
Sentong nung SAKK Tir aser PATC nung Vice Chairman-ia o jembi.
Iba sentong ya Pughoboto GHS nung Head Mistress Yhunyule Kent-i ketdang asü aser Pughoboto SDEO, Watisangla-i anküp tepela o jembi.