Ya koma tokdentsü

  ~ N. Saku Imsong, 4th Mile Diphupar: Dimapur.

Iba khuret ocet ya mapang ka Tir Yimyim aser osang kakettem zünga arur, ya koma asü nung jungla ta shisadanga lir, oda osangtem ajak nung nübur ayongzükba, asen lima raksaba tebilemtsü khuret lemsatepba papertem nung ngua arur, aser ajaki asen lima yanglushinüba teyongyaba ocettem angur.
Saka item tebilemtsü kodasür kong lemsateptsü. Hau atangji asenok ajaki asen lima yanglushitsüla ta, saka kijai koda masür. Anungji item khuret ya sadoksadoka lemsateptsüsa asen Tsüngrem dang sarasadema shisatokden SABANG ka mesemteta shisa lemsateptsü asoshi temelonger ajak adenshia sensaksem aka nunga koma süla ta bilemba lemsateper, aser aji koda inyak nung jungla na ta bilemba shidanger.
Kechiaser, oda joko meyiwa tzümetsüngdang kechianga mashi ama, aser NAPONG-i ma ma ta keyi nem ngusetdaktsüba ama arudarnee, Anungji temelongertem adenshir asen Tsüngrem dang ochi tamang agi sarasadem, tashi meshir mapusora asen lima joko asen lima asen nübur koda masüba jenjang kati menepa arudarnee.
Asenoki tamalen olemsabang nung asen lima (tanishir) P.Renthy Jamir-i tanü Naga lima tasür ayimoktsübatem to mamadoki lirma. Liner dang kangasa pelaba o lemsateper. Ano Tir Yimyim yimobilem nung azüngba amato yamaisa ora tarutsü nungbo asenok christmas aser New Year, Good Friday etc sentong yanglua amongtsü makoktsü ta bilemer. Ano külen na komaka degree ngudir nguaka backdoor majangi mapa mangutsü, kechiaser nai ochishia linüyonga na asemer opposition party maliba Govt nung aji tamakoktsü. Ano külen ACAUT ajanga aibelenbatem shidakba nung tuteta ayimtenaka, meyiper parnokang jail nung ayuba, nübur ola angadangtsü kenyongi mapang manguba, JCC/NTAC tentettem olaji yimdong nung meshimetsür ola amadang bilemba, item khurettem ya kong shisa tokdentsü ta lemsateper.
Kechiaser oda asenoki shimteta ayuba yimsüsürtem parnok molungjang remote control agi shipanga alitsü amaisa aiben ratamata-a bilemer. Oda asen nübur yamai shisabulutepa raratepyonga shibai nüburtemjiang NINANG TONGTONG ama külem külemi meyipshitsüa shibai metet. Asenoki mojing auersang ta sarasademer, saka mojingi koba sanction auyaa-a ali. Parnok ki maka, lenmang maka, kecha khuret maka.
Ajak toktsür Govt. mapa nungi penshion alurtembo asen Aor teimba saka temelen airtembo tangartem dang. 2001 küm JEE nung nisung 40 pass asü (shimtet) yangji asenok Aor 14 liasü oda, oda 5, 3, 2, 1 tashi pass asüba ngua arudar. Aortem shisadangdar ma? Aji tekolok agi memenep asü, marks agi memeneper, masü joko Aor züngshir shinga mali kümogonee.
Ano külen aseni aramesoa toktsür, tangar kinbo Clean Election sayubentsü aliba yamai anogo shia paper nung angur, saka shisashirtem ola kangabo tzüra matem bilemer. Ajidang masü, saka tamangertem agi sünga aliba state ka nung tamangartem anema yamai yipru tesashi onaka NBCC, ABAM aser Arogotem ola mangashir. Oda alima otsütem rongnung yasa MANGTSÜTIBA ta bilemer. Asü backdoor sen agi madokteter. yamaisa ora, oda, oda, hai tamanger ni sen lack 5 agütsütsüa (nai sentepi mao shia) naia koma bilemer ta ajemalua arutsü. Oda, oda tekülem ki azüngtettsü, tershilem agütsür malitsü Tsüngrem mapa inyakner malitsü, ajaki pe ajungtsü dang bilemtsü, Tsüngrem mapa inyakertem tezüdang tenzüktsü, aser lula-a akümtsü, aikati Tsüngrem mapa inyakaka rongsen dang meima akümtsü mapang arudar.
Anungji ya koda asü nung takok ngua Tsüngrem peladakja asen lima temelenshiba ka dangi bener arutsü ta sarasadema temelong tendangertemi anir ochi shir sabang ka tenteta shisa tokden aka nung jungdisü ta iba olemsabang ajanga lemsateper. Tazüngertem ajak Tsüngremi moajangma.