Ya kong tokdentsü

– N. Saku Imsong, 4th mile, Diphupar, Dimapur.

Iba khuret ocet ya mapang ka Tir Yimyim aser osang kakettem nung zünga arur, ya koma asü nung jungla ta shisadanga lir, oda osangtem ajak nung nübortem ayongzükba aser asen lima raksaba tebilemtsü khuret lemsatepba papertem nung ngua arur, aser ajaki asen lima yanglushinüba teyongyaba ocetem angur.
Saka item tebilemtsü kodasür kong lemsateptsü. Hau, atangji asenok ajaki aser lima yanglushitsüla ta, saka kijai koda masür. Anungji item khuret ya sadoksadokba lemsateptsüsa asen Tsüngrem dang sarasadema shisatokden sabang ka mesemteta shisa lemsateptsü asoshi temelonger ajak adenshir sensaksen aka nunga koma süla ta bilemba lemsateper, aser aji kodasür inyak nung jungla na ta bilemba shidanger.
Kechiaser oda yabo meyiwa tzü metsüngdang kechi anga mashi ama, aser napong-i ma ma ta keyi nem ngusetdaktsüba ama arudar. Anungji temelongertem adenshir asen Tsüngrem dang ochi tamang agi sarasadema tashi meshir mapasora joko asen lima aser nübor koda masüba jenjang kati menepa arudar ni.
Asenoki tamalen olemsabang nung asen lima tanishir P. Renthy Jamir-i tanü Naga lima tasür ayimoktsüba to mamadokli ta kangasa mulungnen ken o lemsateper. Ano Tir Yimyim yimobilem nung azüngba amato, yamaisa ora tarutsü nungbo asenok Khristmas aser New Year, Good Friday etc sentong yanglua amongtsü makoktsü ta bilemer. Ano külen na komaka degree ngudir nguakasa backdoor majangi mapa mangutsü, kechiaser nai ochishia linüyonga na asemer opposition party maliba government nung aji tamakoktsü. Ano külen, ACAUT ajanga aibelenbatem shidakba nung tetuta ayimtenaka, meyiper parnokang jail nung ayuba nübor ola angadangtsü kenyongi mapang manguba, JCC/ NTAC tentettem olaji yimtong nung meshimetsür ola amadang bilemba, item khurettem ya kong shisa tokdentsü ta lemsateper.
Kechiaser oda asenoki shimteta ayuba yimsüsürtem parnok mulongjang remote control agi shibanga alitsü amaisa aiben ratamataa bilmer. Oda asen nübor yamai shisabulutepa asatepyonga, shibai metet, tang tenteta aliba BJP telok ya masü, saka shimteta aliba nübortemjiang NInang Tongtong ama külem külemi meyipshitsüa shibai metet. Asenoki mojing auersang ta sarsademer saka mojingi koba sanction auyaa-a ali, parnok ki maka, lenmang maka, kecha khuret maka.
Ajak toktsür government mapa nungi pension alurtembo asen Aor teimba,saka temelen aiterbo tangar kintemdang. 2001 küm JEE nung nisung 40 pass asüba (shimtet) yangji asenok Aor 14 liasü oda odak, 5,3,2,1 tashi pass asüba ngua arudar Aortem shisadangdar ma? Aji tekolok agi memenep asü, marks agi memeneper, masü joko Aor züngshir shinga mali kümogo ni.
Ano külen aseni aramesoa toktsü, tangar kinbo Clean Election sayubentsü aliba yamai anogo shia paper nung angur, saka shisashirtem ola kangabo tzüra matem bilemer. Aji dang masü, saka tamangertem agi sünga aliba state ka nung tamangertem anema yamai yipru tesashi onaka, NBCC, ABAM aser Arogotem ola mangshir. Oda alima otsütem rongnung yabo tesüngmangtsütiba ta bilemer. Asü backdoor sen agi madoktetter ? Yamaiso ora, oda, oda, hai tamanger, ni sen lakh 5 agütsütsüar (nai sentepi mao shisa) naia koma bilemer ta ajemalua arutsü, Oda,oda tekülem ki azüngtetsü, tershilem agütsür malitsü. Tsüngrem mapa inyaknür malitsü, ajaki pei ajungtsü dang bilema Tsüngrem mapa inyakba nung tezüdang alutsü, lulaa akümtsü aser aikati Tsüngrem mapa inyakaka rongsen temeimba asütsü. Iba mapang arudar.
Anungji ya koda asü nung takok ngua Tsüngrem peladakja asen lima temelenshiba ka dangi bener arutsü ta sarasadema temulong teindangertemi anir ochishir sabang tentetta shisa tokden aka nung jungdi sü ta iba Olemsabang ajanga lemsateper. Tsüngremi tazüngertem ajak moajangma.