Ya Shiba Tai Ajanga

– I. Zulu Pongen, Mongsenbai ward, Mkg.

Asen Aori dang masü meimchir ajaki jembiba shin o ka lir, aji “Telongjem nung tashi lir”. Tan Nagaland Sorkar ya kodanga matalokdangba atalokba mapang ka lir, ya kobika aotsüar memetet. Anema nokdakba legislator party ka danga meli-i party ka tang kümtetta DAN kübok longjemtetogo.
Ajaki bilemer alitsü südi, ya komaka aotsü ta, yimya agi longjemerbo ajak akokerji Naga lima ya ayongayonga takokba nung nüburi mulungba ama aotsü imlaa alidang, tia maka ochi mashilen dang ka küma longjemteta, gari totsü nung ochi mashi, jang (PDS) nunga ochi mashi aser RMSA, SSA aser Hindi teachertem ajak mapang shia ita sen khanga züluba paper nung angur, ya koda (?) Sorkari 10% state shilema sang magütsütetba sorkarji tashi tait ta ashitsü makok. Party ajak longjemer tashi agütsütepa aodang tesayur nem ita sen mapang shitak nung magütsütetba sorkar yabo ajak anener President’s Rule aru tajungba süla.
SSA, RMSA aser Hindi teacher ita sen ya center-ibo agütsür sür nung state sorkari 10% magütsütetba tetezü, ano centre-i agütsüba senjia chir alitsü südi ta bilemer. Ya education minister tai asü, finance minister/finance advisor tai ta bilemer? T.R. Zeliang ya nüburi maginüi anendaktsü, tashi angaba atema pelar, saka finance minister tetezü shibai finance manage asür pa dang finance minister ta ajar. Saka nüburibo kecha memetet amai TR Zeliang nem tenüng tera melenshir finance advisor kümdaktsü, tetezü finance department-ji paisa abener ta angateter. T.R. Zeliang ya elected member ka süaka party president kümdaktsü süra pa nem minister portfolio yabo magütsü tajungba süla. Party president shingaia minister portfolio mabener, minister nem portfolio agütsüba ya pa agitsü atema masü saka pai departmental atema sentong yanglua alima tenzüktsü, renlokdaktsütsü atema lir. Saka minister aser parliamentary secretary karibo project tila ka atema 1.5 crore allotment angu nung iba sen nung jagi 1 crore pai agiba angashir. Süra pai 1 crore agira 50 lakhs agi departmental projectji koda inyaktsü. Aji oda yamala ochi meshii ketdang süra kodaser alima renloktsü. Ochi mashi, tashi mait aser departmental anitsü mekokra yamalajibo mapa melenteptsütsü junger.
Koba department südir süaka tulur, tilar ajaki Tsüngrem angateta na kechi atema ita sen angur, aji Tsüngremi moatsüba ta angateta pei ataba mapa meranga inyaktsüla. Shin o ka lir “Service to man is service to God” nisung tenzükbaji Tsüngrem tenzükba lir ta angateta meranga tenzüktsüla. Aser Sorkaria ita senji ita ka tanga memenui agütsütsüla. Peibo nemdena ayur, saka tangarbo kecha machiyonga liteter ama mebilemtsüla. Meshimetsüra anogo shia chiyongtsü angur nung kibong mesürtem kodasür ita sen magütsür. Ita ka ana asoshi dokan nung paki angutsü akok, saka yimten saru, lokti saru maneni arur aser tanurtem school-i aor, ki bara nung alir, itemji mapang shitak nung sen nüngdaker aser kibong züngsem ajak sübutsü aser chiyongtsü nüngdaker. Anungji tang nungibo tesayur süaka, workcharge süaka, contingency service süaka ajak nem department nung tulurtemi mapang shitak nung itasen agüjang ta mepishia zülur. Tsüngremi asenok ajak kasa meimer ta angatetdi.