YAA hon jubileemung tenzükogo

Dimapur, January 19 (TYO) : January 19, 2016 nü Yimchunger Akherü Arihako (YAA) Hon Jubileemung takok ngua tenzükogo aser iba sentong nung tongti tesemdangerji PHED Minister, Tokheho Yepthomi liasü.
Minister, Tokheho-i tongti tesemdanger o jembidang YAA tenzüker nem mezüng tenüngsang agütsü.
“Yimchunger kaketshirtem atema dang masü saka Naga nunger ajak ajangzüktsü atema mezüngpurtemi iba telok tentettsü shisatet aser parnoki mapa tajung inyaka yutsüba, tanü asenoki pelatepa benjung amunger. YAA mezüng tenzüker ajak dang kanga pelar aser Tsüngremi nenok maneni moajang,” ta pai ashi.
Iba telok ya lanu masü saka küm noklangzüng tesadang ka tain kümogo aser liyonga arudang iba telok ajanga Yimchunger nunger aser Naga nunger atema mapa tajung aika inyaktsüogo. Asen state kümteter küm 52 den medemdangra, küm 50 ji mapang talangka süia aruba lir aser tensa melenshia arudang iba telok nung temelenshi aser tebilemba tasen liogo.
Tanü asenoki küm 50 ajungba nüngtem nung benjungtepdang, iba telok kodaser tejakleni len anitsü ta shisadanga telemtetba agidi, ta Tokheho-isa kaketshirtem ayongzük.
Yimchunger Students Union-i iba benjung ayongzüka amungba atema Minister, Tokheho-i parnok nem tenüngsang agütsü aser iba jubilee ajanga tarutsü atema len yapoktsütsü imlar ta paisa shisem.
YAA Hon jubileemung lapokba sentong nung mendenji Khalenmew aser N. Easter na liasü, Dr. Toshila, Women Secretary YBBA-i temoatsü meshia sarasadem aser Akinba T.S President YAA-i tesentepertem pela agizük.
Sentong nung tongti tesemdangeri jubilee nüngo sayatsü, L. Kinthsang, Convenor History Committee-i puti otsü metetdaktsü aser M. Shophu & telok o Jubilee choir nungeri ken aten.
Iba sentong nungsa Parliamentary Secretary, Horticulture, DB & GB, Kejong Chang aser President YTC, Jeozih nati o tatsütsü jembi, Sonol, Assembly Secretary YAA-i anküp tepela o jembi aser Rev. Hankin Joshua Mission Secretary YBBA-i tenüngsang agüja sarasadema liasü.