Yaalon-i Israel Minister menden toktsür

Tel Aviv, May 20 (Agencies): Israel Defense Minister, Moshe Yaalon-i yimsüsütsü menden toktsütsü lemtetba osang ka tanü, Hokolbar nü sangoktsüogo.

“Ni Israel Defense Minister aser parliament, Knesset menden toktsür yimtenren sabang nung mapang tatsüka shilem magitsü lemtetba osang ka ozü Ato Kilonser, Benjamin Netanyahu dang metetdaktsüogo,” ta shia, Netanyahu dak temulung malemba ajanga pai yimsüsütsü menden toktsütsü lemtetba osang ka Yaalon-i tanü metetdaktsü.

Mitkar lenirtem nem yimtenren onüktem nung pei tebilemba lemsateptsü temeten agütsütsü ken o nung mangatettep adoka, Netanyahu aser Yaalon nati tawa yimjak nung asatepba osanga jangjaogo.

Yimtenren ken o balala nung mitkar lenirtemi pei tebilemba yimjak nung lemsateptsü asoshi Yaalon-i ajungshir saka Netanyahu-i kasaji magizüki tena tsüngda mangatettep adokba osang bushiteta lir.

“Ni Israel defense minister shimra, ni aniba Yisrael Beitenu yimtenren teloki Netanyahu-i aniba teloktep sorkar den lokteptsü mulunga lir,” ta taoba Israel foreign minister, Avigdor Liberman-i metetdaktsür anogo tanabuba nung Yaalon-i defense minister menden toktsütsü lemtetba osang sangoktsür lir.

Netanyahu-i 1996 küm Israel Ato Kilonser menden abentsüsa jenjang angutsü maparen nung tongti shilem agiba sülen Lieberman nungtugu nisung ka aküm aser tesülen, pa Netanyahu’er chief of Staff inyaktsü asoshi shim.

Iba mapang nungi tenzüka, Israel foreign minister menden densema, Lieberman-i taoba mapang tongti Cabinet menden ishiben abenba osang bushitetogo.