Yachumaro Cultural teloki Folk music tetoktepba nung takok angu

Kohima, December 07 (TYO): December 08, 2017 nü Nagaland Heritage village, Kisama nung All India Radio Kohima-i ayongzükba Choral & folk music tetoktepba agiogo, aser iba sentong nung tongti tesemdangerji Nagaland Chief Secretary, Pankaj Kumar, IAS liasü.
Iba sentong ayongzükba nükjidongji sobaliba ken wazüka ayuba den ajungkettsütsü aser kentenertem nem sabang agüja parnok sempet sayatsü atema maongka agütsütsü asoshi liasü.
Sentong nung AIR staff temi ken ka mejema Nagaland nung kin 16 nungi shilem agia aten.
Sentong nung o tatsüka jembidang Chief Secretary-i, Naga nunger dak kententsü sempet lir, ta ashi.
Pai ashiba agi, aso 19buba nung Khristan yimsü tenzükba mapang, iba den külemi shisaliok nung terenlok aser tanga lima den tongtepratep jenjang tajungba küma Naga nunger anüdoklen music nung kanga junga akum.
Paisa, 1988 küm pai mezüng Nagaland semdangba mapang nung pai Naga nunger dak sempet lir aser Naga nungerji sentong ajak nung kententsü jangrartem lir ta metet, ta ashi.
Paisa AIR Kohima-i iba sentong ayongzüka lisopurtem sempet ajungkettsütsü asoshi maongka agütsüba atema pelaba lemsatep.
Folk music tetoktepba nung Yachumaro cultural group-i mezüngbuba jenjang nung takok angu, aser tanabuba den tasembuba jenjang nung takok angurji Chang Student’s Union Kohima aser Angphang Union Kohima liasü.
Choral (Dialect category) tetoktepba nung mezüngbuba jenjang nung takok angurji Euphony choir liasü aser tanabuba den tesembuba jenjang nung takok angurji NCRC Choir aser Hallelujah Choir na liasü.
Choral (English) category nung mezüngbuba jenjang nung takok angurji NCRC Choir liasü, tanabuba aser taembuba jenjang nung akok angurji Euphony Choir aser Transfix group na liasü.
Folk category nung takok angur telok asem nem senpet 50000, 30000 aser 20000 agütsü. Iba denji kasa choral category nung takok angurtem nem senpet 30000, 20000 aser 10000 agütsü.
Choral tetoktepba nung takok angurtemi sangküm Guwahati nung North East Choral music tetoktepba nung shilem agitsü.
Item tetoktepba nung tetendangertemji D. Sekhose, Ameü Usou Zao, Zanthunglo aser Jonas Yanthan nunger liasü.
Choral aser folk music tetoktepba nung telok 11-i shilem agi, aser parnok rongnung Chang Student Union, Cultural Promotion Society, Yachumaro Cultural group, Angphang Union Kohima, Yimchunger Cultural club, Tar Lemjem Menungra cultural club, Monglem Help, Sitimi village cultural troupe, Euphony Choir, NCRC Ao Kohima Choir aser The Transfix Group temliasü.
Sentong nung comperes ji Imtinaro aser Temjen na liasü aser K.V Ramachandran, DDG HOO-i lokti pelaa agizükba o jembia liasü.