Yajen Aier Government High School Golden Jubilee among

Dimapur, October 27 (TYO): 1967 küm amenokba Middle English school, Yajen Aier Government High School Mopungchuket tanü Golden Jubilee mongogo; iba sentong nung tongti temsemdangerji, Principal Director of School Education, Nagaland, Smita Sarangi, IAS liasü.
2015 küm iba school ya high school-i upgrade asü aser kasa küm Yajen Aier nüngtem nung school tenüng jaloktsü; Yajen Aier ya iba yim nungi lir aser mezüngbuba Naga Deputy Inspector of Schools inyakba sülen 1975 küm Director of Education menden nungi anisüngzüka liasü.
Iba sentong nung jembidang Principal Director of School Education, Smita-i school-i iba alizüng tongtetba aser 2017 küm HSLC tatidang nung 91% pass percentage anguba atema tenüngsang agütsü.
Laisa kaketshirtem dang meranga azüngtsü aser yimer nem maneni tenüng tajung bener arutsütsü atema ayongzük.
Laisa Village Education Committee-i tajungtiba nung tenzükba atema pelaba metetdaktsü.
Lai ashiba agi, shisaliok jenjang tajungba akumtsü atema tang school education department ya temelenshi tulu ka nung inyakyima odar.
Laisa, sorkar school tem nung kaketshirtem enrolment timba akumtsü nüngdaker, ta ashiba den külemi sorkar school tem nung azünger kaketshirtem ajema akumba kuli meyipa reprangshitsüla, ta ayongzük. Sentong nungsa lai school indang Golden Jubilee souvenir sayaja liasü.
Kasa sentong nung DEO Mokokchung, S.T.Nokdang Longkumer, EAC Kubolong C.Phuniang, VEC Chairman K.Alem Aier nungeria jembi aser retired Secretary of Development Authority of Nagaland, N. Bendang Ao-i Yajen Aier’er kinüngertem tenüng nung jembia liasü.
Kasa sentong nung school anthem ken aten, school choir-i Jubilee ken aten aser Youth Department Mopungchuket Baptist Church nungi lanurtemi ken ka tena liasü.