Yakob Tsüngrem -T.Ken 146:1-6

“Shiba pei teyari asoshi Yakob Tsüngrem lir, shiba teimla Kibuba pa Tsüngrem dak lir, tepelatsü” (t.5). Iba yagi tanü aser asüng asen nüngdak ajakji Tsüngrem lir ta ashir. Kodang nai Tsüngrem metetter, na tepela kar, teimla aser teyari kar: Pa den jajaba nung tepela, tanü tebilemtsü khuret abener asoshi teyari aser tarutsü asoshi bilemba nung teimla. Talila nai kechi aginer ?
Yakob Tsüngremji shiba? Mezüngbuba, Paji teyanglur. Tekong 6 ashir, Pa, “shibai anüng aser ali yanglu, tzüyim aser item nung aliba ajak; shibai atangji teti ayur” Iba lima yanglua taküm lidaktsütsüsa uluba nung teperi shisatsü teperi aser tashi teperi pa lir. Pai tanü asen tebilemtsü ajak nung yarir.
Tanabuba, ” Pa obendanger, shibai tajemreper nem ochi agütsür” (t.7). Kodang nai tai makaba nung aitsür, Tsüngremi metet. Obendangbaji pa nem yujang. Tsüngremi dang raratsü akokba nung ne mapang teindok. Pa nübur ajak den Pa dena lir,aser Pai kechi shidak aji inyaktsü.
Tasembuba, Paji Tebu lir. Tekong 7 nung tebui ayabatem mesüba noksa agütsür. Tsüngrem o-I teti asenok dang Pa temoatsü tejangja sayur. “Aser kü Tsüngremi Kibuba Yisu Khrista nung Pa sentsüwangshi nung Pa rongsen yari nenok tenüngdaktsü ajak agütsütsü” (Fil.4:19).
Pezü, Pa tekümzüker. “Kibubai puoka alirtem nem nüji agütsür. Kibubai tenük tapoktem lapoktsür…. Kibubai temeshipur meimer” (t.7,8).
Tatemsa, pa chuba. “Kibubai teti chubatsü” (t.10). Ken ken nai bilemtsü, “Ni iba ama chuba ka akatsü metemsü. “aji shitak, saka Pa Yakob Tsüngrem lir. Yakobi metsüdak, aser aibelen, saka Tsüngremi Pa Tsüngrem ama ali. Tatem maka Tsüngremji asen jenokdak lir.
Tsüngremji ne jenokdak tulutiba lir. Saka odangbo na mejenokdaktsür; Pai na asoshi tashi agütsür aser na tashi itdaktsür. Yakob Tsüngremji ne Tsüngrem asü? Yamaji süra, Pa dang jaang aser Pai na yaritsü.