Yakub alenseta südaktsür külen tepuokdak tesem nung aremtsü

Pune, July 27 (Agencies): 1993 Mumbai blast ken o nung aitsür tasüba agi merenshitsü obendang agütsür alisang Yakub Memon, nüburtemi pusema aruba ajanga, lokti tsüngda mangatettep madoktsü aser lendong adokba nungi kümzüktsü atema, Nagpur Central Jail nung ketdangsertemi pa alenseta südaktsür külen tasümangji tepuokdak tesem nungsa aremtsü atema telemtetba ka agitsü akok.

Mail Today osang ajanga metetdaktsüba agi, pa tasümang par kinunger nem magütsüi tepuokdak tesem nung dang aremtsü asoshi ketdangsertem sentong lir.

Iba telemtetba agiba ya ozüng aser telatetba nung aibelen kecha masütsü aser mangatettep madoktsü atema lir.

“Onoki pa tasümang par kinunger nem magütsütsü, ajisüaka tepuokdak tesem telung nung pa pa asüpila sentong agidang kinungtsü Rahin aser jala Zubeida nabo tendaktsütsü,” ta ketdangsertemi ashiba kasa osang ajangsa ashidang pa aremtsüba tesemji tepuokdak telung nung alu ayimba tesem “Goal Maidan” nung aremtsü ta shisem.

Aji oda süaka Memon atema okatsüri iba telemtetba den raratsü aser tasümang meshizüktsü atema temelaba meshitsü.

“Supreme Court-i telemtetba agütsür külen ang onoki apusotsü. Ajisüaka tasümangjibosa meshizüktsü atema temelaba meshitsü,” ta Memon meyong okatsür Anil Gedam-i ashiba Mail Today osang ajanga metetdaktsü.

Yakub Memon atema taochi meshiba shidi Supreme Court nung Hombar nü nungi agizüka jembidar aser kasa olemtepji ano Mongulbar nüa akatsü.

Supreme Court nung iba taochi meshiba ken o angadangtsü asoshi nisung asem agi akümba ‘special bench’ ka India nung Chief Justice-i shimtettsüogo. Memon-ia tasüba masü saka iba dang nung temerenshi tepungbaba ka ang pa nem agüja ta taochi meshia Maharashtra sorkar nem shidi ka agütsüogo.

Ajisüaka India nung yimsüsürtem, tesüiba mapang obendangertem aser okatsürtemi, Memon anema obendang agütsür aliba melenshitsüla, ta Tir Pranab Mukherjee dangi shiti ka yokogo.

Pa ya July 30 nü alenseta südaktsütsü latetja lir.

1993 March ita Mumbai nung item bomb lendong tem ajanga tajemba agi nisung 257 tepset. Police-i ashiba agi, Memon adianu Tiger Memon aser ozüng alema mapa tamajung inyaker tetsüti, Dawood Ibrahim na asalendong ajang item lendong ya agütsüba lir.

You must be logged in to post a comment Login