Yakub Menon temepishiba SC-i magizük; July 30 nü alenseta südaktsütsü

New Delhi, July 21 (Agencies): 1993 küm Mumbai nung bomb aika pokdakja amakba ken o nung aibelensang Yakub Abdul Razak Memon-i taochi meshia shidi züluba tanü Supreme Court (SC)-i magizük, ta osang ka ajanga mettetdaktsü.
Memon ya July 30 anepdang 7:00 ako nung pa tang puoka aliba Nagpur Central Jail nung lisü agi alenseta südaktsütsü.
Chief Justice HL Dattu-i aniba züngsem asem bench kati Memon temepishibaji magizüki, pa benokba tamendakdakji 2002 küm SC-i curative petition asoshi lemtetba nung lateta aiba küboki maiter, ta ashi.
Arishi küm 53 Memon-i pa temepishiba shidi nungji, pa 1996 küm nungi schizophrenia ajanga shiranger aser küm 20 junga tepoukdak liogo, ta shia lir.
Kasa aibelen asoshi aibelener kaji khen nungi akümli piyong tepoukdak ayutsü aser temerenshi tulu magütsütettsü, ta shia pai tasüba temerenshi dang nungi temerenshi tajemba agütsütsü mepishia liasü.
Memon-i pa nem tasüba temerenshi obendang agütsüba reprangshimtsü asoshi mepishiba shidiji April 9, 2015 nü SC-i magizüki liasü.
1993 küm March 12 nikongdang Mumbai nung bomb 13 poklokja amakdang nisung 350 asü aser nisung 1,200 tashi yiruba ken o nung March 21, 2013 nü SC-i Memon tasüba agi merenshitsü obendang agütsübaji reprangshimtsü atema Menon-i mepishia liasü.
Pa taochi meshiba temepishibaji taküm April ita nung Tir Pranab Mukherjee-i magizük.
Iba amakba nung pai senotsü agi yariba densema shilem agiba atema 2007 küm July 27 nü Mumbai nung Special TADA Court katia pa tasüba agi merenshitsü obendang agütsür liasü.