Yakub temepishiba magizüksang, judge Dipak amokmerenogo

New Delhi, August 07 (Agencies): 1993 küm Mumbai amakba ken o nung aibelensang Yakub Memon-i taochi meshia shidi züluba magizüksang, Supreme Court Justice Dipak Misra-i pa amokmerenba shidi ka agizükogo, aser iba shidi anguba sülen Delhi police-i pa nem security takhangba agütsüogo.

Iba dak sentakba nung Delhi Police-i ken o ka benokogo aser bushisüngdang tenzükogo.

TV channel balala ajanga ashiba agi, iba shidiji ajanga Justice Misra atema security akhangshijaka pa tepsettsü, ta amokmerenogo.

July 29 nü Supreme Court judge züngsem asemi akümba menden kati Yakub Memon indang temepishiba shidiji magizüki liasü, koba ajanga July 30 nü pa asoba anogomug nung alenseta südaktsü.

“April 30, 2015 nü TADA court-i Yakub Memon anema tasüba agi merenshitsü ozüng agütsü aser July 30 nü pa tasüba agi merenshitsü anogo latetja liasü,” ta Justice asem- Dipak Misra, P C Pant aser Amitava Roy nungeri metetdakja liasü.