Yaküm India nung police 383-i taküm tenla agütsüogo: IB

New Delhi, October 21 (Agencies): BSF aser CRPF nungi sepai 98 densema yaküm linük nung police 383-i duty inyakdang taküm tenla agüja süogo, ta Honibarnü Intelligence Bureau director, Rajiv Jain-i metetdaktsü.
Tanü New Delhi nung Union Home Minister, Rajnath Singh leniba nung agiba Police Commemoration Day sentong nung jembidang Jain-i, September 2016 nungi August 2017 tsüngda Jammu & Kashmir nungi police 43 densema police force balala nungi sepai 383-i taküm tenla agüja süogo, ta metetdaktsü.
Parnok rongnung Uttar Pradesh Police 76, BSF 56, CRPF 49, J&K police 43, Chhattisgarh police 23, West Bengal police 16, Delhi police aser CISF 13, ITBP 11, Bihar police 12 aser Karnataka police 2 lir. Police timbaka Pakistan tsütsülen nungi injang yoka raradang, Jammu and Kashmir nung kiralongra anema raradang, Maoist telungpur dak sendakba nung raradang aser duty balala inyakdang asü.
1959 küm China sepaitemi injang yokdang police 10 asüba aser India kümzükdang sepai 34,400 asüba bilemteta parnok nem akhüm agutsütsü atema kümshia October 21 anogo nung Police Commemoration Day ayongzüka amonger.
1959 küm tashi Indian police-i India aser Tibet tsüngda mile 2,500 arrtsü nüka arua liasü.