Yamai inyak nungbo kanga tajungba asütsü ta kü tebilemba lemsateper

– Y. Imti Tzüdir,  Nuton Bosti, Dimapur.

1. Khristan Ken (Church Hymnal):
Ao Osangtajung Ken kaket nung enoka atenba ya timba English ken nungi meyipzükba dang lir. Item ken timba ka Pastor, Missionary, Evangelist-temi zülu. Asen Aortem rongnung Tsüngrem tenzükba wadang nung alirtemi e.g. Pastor, Missionary, Evangelist, Theologian aikati ken meyangluteter aser staff/tonic sol-fa notation memetet. Sayutsüngir kaji Laishiba nung dang masü saka Khristan ken nunga kanga jangratsü / metettsü nüngdak; kechiaser ken ajanga samaba tanelatem anir arur. Hau, item ken International ken asünung ajaki ashitsü nüngdak; saka item dak alaka asen nisungi yangluba/mejemba Osangtajung Ken kaket nung enoka atentsüla. Asen nisungtemi züluba (author) aser ABAM-i züluba ken itemi enoka lir: (Osangtajung Ken 2012 Edition magi): Tenüng teta mezülur saka ken number dang adoktsür. Ken Nos. 81, 112, 119, 344, 97, 117, 260, 265, 375, 421. Ano item kenbo author aser music anaprong asenok Aortemi / ABAM-i yanglu: Nos. 110, 189, 194, 228, 111, 419.
Asen chirnurtem tongtibangsa theology azüngertem music nung jangratsü aser staff notation angazüktsü kanga dang ajungshitsüla. Tanü asüng asen Aor rongnung kentener / ken mejemer aika adokogo, anungji temesüng nisungtemi yanglubaji dang masü saka asen nisungi tanela nung ajungshia yangluba ken aika Osangtajung Ken nung enoktsüla.
2. Tanabuba nung tajayim ajaba:
Asen Aor sobaliba nung nisung ka tenüngteta ajatsü memelar, saka shitakba tajayim ajatsüla. Tanü asüng tanurtemi ‘uncle’/ ‘aunty’ ta dang aikati ajar. Saka Ao o nung tajayim shitakbaji ajatsü tsüraburtemi sayutsüla. Tatishitsü agi: obuo, otsü, oko, onü, odi, oba tanubu, tanutsü, amo, tinu, kabu, ilang, rabi, atongbu, atongtsü, etc. Anungji item nüngja shiba dang kechi ajatsüar aji meteta ajatsüla; saka tzümar nungmar ama tenüngteta ajaba yimya melentsüla, aser tongtibangsa nü dang tambu / tantsü dang tenüngteta majatsü mepishir.
3. Sentep kidang special sentong alidang mesüra asüpila (funeral) sentep alidang mesüra function balala akadang programme alemer. Iba sentongji tembanger külen aikati iba programme copyji na amendak prokshia endoka yutsür aor. Mesüra tenla kidang na amenba menden nungji yutsür aor. Iba jagi ki janar ta yimdangi aittsüla. Aser talisa ibai mezüngmeshiba mapa ka ta angatettsüla; kechiaser sentepi aru nung na taodangbo iba programme copy jagi ki janaa yutsübaji mezüngmeshiba mapa ka masü no?
Anungji ajaki iba yimya endokdi arungma.