Yamai kopiga otettsü ?

Kidang chiyongtsübo maka saka tashidak menatsü tsübuba agi mapa kecha meinyaki kidang amongtsüba ya anisüngzükba mapang ka masü saka shisabolutsüba mapang ka lir. Atangji, menatepa aoba tashidak wara tulu agi alima ajak ayimsünga aoer asünungji, ibaji nokdangtsü atema yimteni nisung shinga kimaia maludaktsüi ozüng agi nokdanga lir, anungji koda masüba shilumanem, asüama aser jangotsü alitsü nüngdak ka mesüra shinga kimalen kisemtsüsemi aotsüa majungshir aser lokti adenshitsüa memelar. Ibayongji, asenok arogo nungertema tenla kidang amongnü dena külemi telongjem sentep sentong magitetter. Iba amaisa , corona tashidak wara ya mesüitem tashi asenok arogotem nung tenla ki lapoka tamanger telongjem sentep magi ata nunga koma süla (?) ta taoba hopta nung asenoki bilemdangogo. Atangji, arogo aika nung government-i ashiba angaa March 22 amongnü temoatsü sentep sentong nungi tenzüka aonung aser anüngdang tenla kidang sentep sentong kecha melii pei pei kidang dang tekülem sentep sentong yanglua agitsü ajungshia arudagi. Iba denji ano sannükertemi cable tv aser youtube ajanga Tsüngrem o jembiba yokdagi. Atangji, Tsüngremji nisung teka agi yangluba tenla kidang dang masü saka ajak nung lir, anungji tenla kidang külemisa masüyonga asenok kidang aser mapa inyakdak asenoki Tsüngrem külema Pa den jembitsü akok. Ano, talisa Laishibai ashiba Tsüngrem tenla kibo asenok mulungjang ya dang lir, anungji asen molungjang nung bilembatem Tsüngrem tsüngdang tagizüktettsüsa asenok lira, shitakba tenla kidang tenlabajibo aji asütsü. Ajsüaka, alemli tenyartem putu nung arogo tenzüka longjembajia Tsüngremi Pa dak amangba purtem külemi longjemer Pa temeim aser sentsüwangshi mapatem inyakdaktsütsü asoshi longjemdaktsüba lir, anungji Khristan taküm ka asoshi külem amangba purtem telongjem arogo tenteta külemi külemtsü aser külemi telongjem ka ser Tsüngrem mapa inyaktsübaji kanga tongtibang lir. Aji oda, tang amaisa mapang talangka sentep külemi melitettsüsa aküm nungbo arogo telongjem tashmait aotsü aser tatsüka orrbo arogo nunger aika arogo nunger masü amai kümadoktsü. Atangji, iba ama tasütsü wara tsübuba mapang kibong aika Tsüngrem anasai tali aoer aser tamang nung tashi itshir saka ano sarasadem mapang anitsüsa lenir kata maliba kibonga aika lir. Item asoshiji sarasadema sentong kar bilemdangtsü nüngdaker. Joko, asenok arogo karbo külem temoatsü sentep ana tashi magii arur asünungji, tenla sena mesarur aser ita amar, anungji toklang tenzükertem nem ita sen agütsütsüa tebilemtsü adoktsüa akok. Atangji, tasütsü tashidak nungi kümzüktsü asoshi yimteni dena lokti senden aser sentep sentong malitsü shiaka arogo karbo tamang agi akhi ama sentep sentong agia aoba angur. Tanüla mapa yabo nisung nük agi anguba aser nisungi bilemba ama masü, tamang mapa, anungji ibaji shitak tai ta ashitsübaji tasak. Yisu taküm alidang dang masü saka asen lima nunga nükpoker aser shiranger jungtsüba aser temenen tanüla aridoktsüba tang taküm alirtemi ajangshiogo. Itemji tamang mapatem lir. Ajisüaka, iba tashiji tamang agi mapa küma inyaktsüsa melira, tzüwa mashi ser Peteri tzü nung pongok amai asütsü. Ano külen bilemdangtsüba kaji, tashidak mena tsübuba agi külemi ajurutepa menungteptsü aser tangshitepa mamentsü atema tenla kibo shibanga ayu saka jangotsü ayokdakbo mongdang amai adenshia nungteper ta asüba ya kopiga aotsü (?) ta temulung animesüngzükteti bilemer. Yamai talangka aotsü asü nungbo jangotsü ayokba dokana akhi ama anepdang nungi nikongdang tashi lapoka ayutsüla , tenla kidang tashidak memenatsüsa senteptsü melatsüla aser telok tilalabo alu mapai aotsü melatsüla. Iba amaisa ao nungbo, tashidak wara sülen ayawara arutsü, ashir auer tali poktettsü aser tamanger agi mamanger küma aotsü. Ashiko, akhidang asentenshi adokba mapang pei tamang yari arogo lemsaba ama lemsatsüsa ataloktsüa akok. Item shisabolu khuretji bena asenok ajak asoshi kanga sarasademtsübaji tang mapangba ya lir.