Yamai melenshi nung jungdi sü?

~ Er. C. Kazükaba Jamir, Kohima.

(Teküpboklen agüja aliba ojang ishika temelenshitsü ajitet nung yamai melenshi nung jungdisü ta kü tebilemba ka lemsateper.)
1. Nüji aser Nüchi : Tena ya olasübo kasasa adoker, saka tetezü balala nung amshir. Kodang asenoki talang mesüra ana nung aliba oset kar tuyudir iba-ji, idak-ji aser yangji ta-ji amshia tuyur. Aji asünung asenok teburi amshiba oset nü (spear) yangji lir ta tuyudang nüji ta amshir. Tanabuba nung nüchi yabo temeten anguba, anisüngzük aser peisasa yimsü asüba nung amshi tajungba asütsü. Anungji tang nungibo nü tuyudang nüji ta amshitsü aser yimten temeten anguba indang jembidang Nüchi/Nüchiso ta amshitsü ajungshir.
2. Amtsük aser Amsang : Tena ya oset ka asoshi amshiba tenüng dang lir. Am agi yangluba chiyungtsü dang kari amtsük ta ajar aser kari Amsang ta ajar. Amtsük yabo am ali nung tsük ta asüba dang, saka amsang yabo am totzü nung asangba tetezü tajung lir. Aji asünung tang nungibo Amsang ta dang amshitsü ajungshir.
3. Dang aser Tang : Tena ya olasüba kasasa dang adoker, saka oren nung nüngdak balala asoshi amshir.
Dang : Teyariba o, jangjatsüba o (Auxuliary verb)
Tang : Iba mapang, teinyakdak (now)
Tali angatettsü asoshi oren kar ajiang:-
a. Pa dang dang shiang Olasübo kasasa adoker saka orenji tetezü/
b. Pa dang tang shiang nungdak balala asoshi amshir.
a. Mezüng oren nungjibo pa kisüng dang ang ashitsüba o lir. (tangar dangbo mashitsüba o)
b. Tanabuba orenjibo pa dang iba mapang nungsa ashitsü o lir.
Yamaji dang aser tang ojang ya oren balala nung amshir. Tanü reprangra kaket zülur aser osang kaket nung ocet zülur aikati tena ya mebendangi züluba angur. Tazüngertemi itemji angudang otsü mesüra orenji mangatet nung aiben tezü atanger aser mezüngnüi akümer. Anungji tang nungibo tenaji bendanga amshitsü ajungshir.
4. Senpet aser sempet : Tena ya olasübo tera balala saka tetezü ka nung amshir. Tetenzük nungi laishiba aser ken kaket nung sempet ta dang amshia aru. Küm ishika tejaklen nungi kari purateta tena ya bendang.
Senpet :- Teka agi kongshitetba oset
Sempet :- Teka agi mekongshitetba oset (Quality)
Ibai benshitet nungbo kanga jungla, saka tanü asüng lanur aikati mebendangteter. Anungji parnoki asen oshiji mezüngnür, mezüluteter aser ano mangateter. Aji asünung sempet ta dang ajak nung amshitsü tajungba ta bilemer. Kechiyong oren nungjagi dang angateta adoktsü lir. English nunga bank ojang ya sen ayudak, tzüküm aser azü bendendak ta ajak nung kasasa amshir saka oren jagi dang angateta adoker. Anungji tang nungibo oren ajak nung sempet ta dang amshitsü ajungshir.
5. Prangpong aser merangpong : Tena ya osetbo ka dang saka kari prang agi tenzüker aser kari merang agi tenzüker. Asenok ajaki metet prang yabo kecha tetezü maka saka merang yabo ocet temerang ka lir. Yamaji merang yin nung tapok keta yangluba agi merangpong ta ajar. Anungji tang nungibo Merangpong ta dang amshitsü ajungshir.
6. Tzünglu aser Tsünglu: Tena ya ojang tetezübo ka dang saka tezülur aikati balala zülur. Kari tzü dena aliba agi tzünglu ta amshidanger, saka ibai olasü adoktsü kanga tasak. Kechiyong tsünglu yabo olem ana nungi-tsüng-lu ta olasü adokteter saka tzünglu yabo olem asem agi-tzü-ng-lu ta dang adokteter. Tzüng ji olem ka mekümteter, aji asüng tang nungibo tsünglu (shidakba) ta dang amshitsü ajungshir.
7. Taidok aser tatok: Tena ya tetezübo kasa dang, saka asenoki amshidang dang balala amshir. Otsüla oboula nunger mapang nungi tai adokba dang tatok agütsü ta dang jembia aru. Laishiba aser ken kaket nunga tatok ta dang lir. Anungji tang nungibo ajaki tai adokba dang tatok agütsü ta dang amshitsü ajungshir.
8. Süngtsük aser süngpak: Kodang sung tepolong tulu (log) ka metongyimi apuapua rangsadir, ibai süng tapak akümer. Iba tapak dang süngtsük ta ajaba ya tetezü majung. Asenoki sen note dang senpak aser long tapak dang longpak ta ajar süra tang nungibo süng tapak danga süngpak ta ajatsü ajungshir.
9. School aser Skul: Ibai English ojang School nungi asen o nung skul ta meyizükba lir. Tsürabur mapang school maka asünungji iba nungjaji parnoki mamshi. School ya tangar o saka asenoka kabosa akatsü nungdak asünungji kodang sorkar aser tangar kin oshi balala den jilajiteptsüsa adokdir, idangji school ta amshitsü aser asen Aor rongnung kaket keno zülu ajak nung skul ta amshi nung jungdisü ta kü tebilemba lemsateper.