Yamai tang ao nungbo mejonglisü na ?

~ N. Saku Imsong.

Hai asen senso tajungtem asen kin-e ken jungjunga shisadangti koda? Oda tamalen dated 21.1.2019 yimozulu dangi ta sür Toshi Ozükum, aser January 8, 2019 nung AROK TARUTSÜ SHISATANGREN ta sür Dr. Aküm Longchari, aser 13.2.2019 nung asen liner Dr. Toshimanen, parnok tebilemba shidangba tebilembatem den to oda tezülur ajaki asen nübur asoshi khuret abenba jenti asenoki paper ajanga nguogo. Parnok dang kangasa pelaba lemsateper.
Haone ya oda asen kin asoshi ayip majanger aser yanglushinüba nüburtembo aika lir, saka mangdang mangur. Anungji nia osang zülurtem ajak den yaritepa kü tangatetba kar lemsatepnür.
Tamasa asen kin-e arok tebilemtsü bena shisadanger TEMEIM, OCHI, SHISATSÜ TEINTANG, AROK AJUNGTSÜ BILEMBA ETC item ojangtem ya shidakba asen AOR SENSO kümdaktsüti koda? Asenok rongnung itüm ojangtemjidang Aor Senso kümdaktsü nung tangar kin ajaki asen kin tali jangjatsü.
Süra aji kodasür tenzüktsü? Aor ajak ya kibong ka chir ama asütsü, shingaia shinga mezüngtoktsü, yimtisanger yimnanor ta bilemdangba shisatsü samatsü, tsükongsanger ta yimya süba o samatsü, au aji alitsü.
Anungji asenok teraksa tulutibaji tsükong ism, yimtsüng ism, kidong ism etc, aji asünung asen Aor asoshi takoktsü ka süra yamai asünung koda? Asen lima nung CONSTITUENCY 10 (Ten) lir. Anungji itüm ajak nungji town aser yimtsüngtem lir. Anungji asenoki dang arok ajungtsü asoshi shisadnagtisüra, constituency shiaji yimtsüng terara dang lirji oda arungkoto kecha yamai rongsen melalue, aser yim senso nungi shimer ta azü tokshia enki shipanga masayatepi küm termji tangatettep nung yimtsüng ajakji maongka angutsüsa melentepa sen aser nübu mendoki yimli agütsütepa yimtsüng ka nung dang tetemjen nübu shimteter yok nung pa or lajia (uncont) ama asütsü noklem tajung atatsü, area sanger asoshia terenlok shidak pei mapang tajungtiba inyaktsü merangtsü, aser pa or lajia sentsü kecha malitsü ta oda asen lima ya kodak lima mesüka alitsü amai nükla nung angur.
Saka dang amaisa inyaktep nungbo alemli asen tetsü tebu mapangbo leptep tsüngtep liaka osang shiokteperang arua yim o yim na anemtep, saka tanü putu nungbo meimlaba mapatem inyaka asen lima tesama tia ajurutsü shisabuluosa bilemtsür.
Oda tanü nenok lanu putu nungbo yimtsüng tulu, tila ajak nungi tazüng tashir nübu jenti Tsüngremer moaja arudarji aji aroki ken jungjunga shisadanger, temeim ochi shisatsü teindang, arok ajungtsü bilemba shisatsü ojangtemji C.A.B magizüktsü ta Northeast pur ajaki akang akanga nokdakba amai oda agüja aliba ojangtemji asen Aor Senso ta ajang ajanga angatet nungbo, asen lima Ao lima ya küm ishika tsüngta nung sentsüpranga yangertettsü, aser dangar kin ajaki asen Aor asentenshir akümtsübutsü tenzüktsü.
Kechiaser Tsüngreme Israil nunger pa nübur ta shimtetba amaji Tsüngremesa Nagaland nung aliba nüburtem anitsü, aser kintem yaritsü, aser nüchi kümdaktsütsü mechi Tsüngreme pa osangtajung Aor dangi tamasa yok ta asenoki shidakba bilemdanger angatetra tanüngba watangtemjibo Tsüngreme atangji ataloktsütsü.
Anungji otempanga Tsüngrem tenzükera süang alima watang nung nokdakera süang, asen kija pelatsüsa, aser ajangzüktsü asoshi dang bilemba, tangatetba nungi apusoa arok lirometem lemjem nung atenshir aposoti koda.
Alima yanglutsü bilemtisüra rongsen, nok, nü, enjang, tongtipang masü, saka constituency 10 prong nungji arok ajungtsü bilema tamalen ashiba ojangtemji asen Aor sensoji kümdaktsür ken asentenshia oak atena tepela washi washir kibong ka chir ama tepong langer, aseni dangar mebushi-e dangar kin-e asen aküm tsübua bushia arutsüsa tepong ka küma alenteper jenjang yimshir aposoti nee ta ayimoktsür. Tsüngreme asen Ao kin nüka moajangma.