Yaongyimchen Community Bio-diversity tesem nung Molulem temesüng ka angu

Dimapur, November 15 (TYO) : Longleng District kübok Yaongyimchen Community-i 2010 nungi Bio-Diversity tesem wazüka ayur aser 2012 nungi iba tesem nung Molulem ozü arua anenzükba sülen nungi parnoki iba ozü wazüka ayutsü meranger.
Küm shia Molulem ozütem sentsü balala ana arua mungzüker saka November 10, 2015 nü Dr. R. Suresh, Scientist, Department of Endangered Species Management, Wildlife Institute of India aser Yaongyimchen Community züngsemtem den LEMSACHENLOK Chairman Y. Nuklu Phom nungeri Molulem ozü sentsü temesüng ka angu.
Yaongyimchen Community Bio-diversity Conservation Area nung Molulem ozü temesüng ka yimzüa aliba angu aser iba indang noksaji Nikil-i tangok. Iba ozü ya Artic Coast nung anguba “Gyr Falcon mesüra Ger Falcon” den tereprangtsü mesüktepa lir aser iba ozü ya ‘endangered species’ rongnung densema lir.
Iba ozü nem “Snow White Amur Falcon” ta tenüng jatsüogo aser iba ozü anguba ajanga Nagaland nung arua mungzükba ozütem rongnung tanga White Falcon tem dena lir asü ta tasüngdangba ka arur.